Pavarësisht fyerjeve që eprorët i bënin, një shqiptar në Britaninë e Madhe ka dalë i fituar pas përballjes me ta në sallën e gjyqit.

Vasilis Kodra do të përfitojë një shumë prej 11 mijë paundësh si kompensim. Ngjarja ndodhi një vit më parë kur shefi i kuzhinës në restorantin e quajtur ‘La Vita’ ku punonte Kodra, Robbie Syme ka ngritur zërin ndaj punonjësve i revoltuar se punonte me afrikanë, shqiptarë dhe rumunë.

Më pas, ai ka shpërthyer me tone raciste ndaj shqiptarit Kodra, i cili një javë pas incidentit u detyrua të karantinohej për shkak se u infektua me COVID-19. Menjëherë pas mbylljes së karantinimit, shqiptari ka shkuar në vendin e punës dhe kur pyeti shefin e kuzhinës për mjetet e tij, ai i foli në të njëjtën mënyrë. Syme i kërkoi Kodrës të dilnin jashtë dhe ta zgjidhnin këtë çështje me sherr, gjë që shqiptari nuk e pranoi. Kjo bëri që Syme ta kapte atë nga fyti dhe ta gërvishte.

Edhe pse Kodra nuk reagoi ndaj dhunës që po ushtrohej mbi të, pronari i restorantit, Marko Acari e pushoi atë nga puna, shkruan The Mirror.

Kodra e denoncoi ngjarjen në polici. Autoritetet nuk mundën të gjenin prova nga kamerat, sepse pamjet e asaj dite ishin fshirë të gjitha.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.