Ka marrë fund pak ditë më parë çështja thriller me vjedhjen e një foshnje shqiptare nga maternitet shtetëror i Greqisë. Një 45 vjeçare greke, nënë e dy fëmijëve 10 dhe 4 vjeç nga martesa të mëparshme, humbi fëmijën e tretë me bashkëshortin aktual 2 muaj pasi zbuloi se ishte shtatëzënë. Gruaja nuk informoi askënd për humbjen po vazhdoi të sillej sikur të ishte shtatëzënë, përderisa dhe pesha e saj e lejonte kamuflimin.

Njëkohësisht, paraqiste tek familjarët analiza të shtatëzanive të mëparshme si aktuale e kalonte kohë në maternitetin shtetëror. Kur u afrua dita e lindjes, vuri në shënjestër një 28 vjeçare shqiptare që solli në jetë pak muaj më parë, në orën 10.30 vajzën e saj të dytë. Nëna e lumtur preferoi metodën rooming in,domethënë të mbaj foshnjen pranë vazhdimisht. Rreth orës 04.00 të ditës tjetër, lehona pasi ushqeu foshnjen fjeti e lodhur. Gjumin e ndërpreu një zhurmë e fortë, e tronditur pa krevatin e foshnjes bosh dhe kërkoi ndihmë nga mamitë e infermieret.

Por foshnja ishte zhdukur pa lënë gjurmë. Gruaja greke 45 vjeçare e fshehu në xhaketë dhe u kthye në shtëpinë e saj, duke e justifikuar si lindje ekspres dhe se nuk duronte dot maternitetin psikologjikisht.

Gazeta “Prothothema” e  cila ka ndjekur rastin shkruan se kërkimet e policisë zgjatën për javë të tëra derisa ranë në gjurmët e gruas 45 vjeçare. Testi ADN vërtetoi se vogëlushja ishte fëmija e dytë e çiftit shqiptar. 45-vjeçarja ditët e fundit mori dënimin me 9 vjet e 4 muaj burgim. Ndërkohë që çifti shqiptar kërkoi dhe dëmshpërblim nga materniteti për ekspozim të foshnjes në rreziqe dhe tronditje psikike e pasiguri nga ngjarja.

Gjykata ka dënuar maternitetin dhe kompaninë e sigurisë për mungesën e mbrojtjes ndaj lehonës e foshnjes dhe për stresim e tronditje shpirtërore të prindërve të rinj, duke vendosur dëmshpërblimin prej 15.000 eurove për secilin.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.