Zjarret kanë përfshirë edhe Kosovën për shkak të temperaturave të larta të këtyre ditëve.
Zjarre janë konstatuar në Prizren, Pejë, Gjilan e Mitrovicë, etj., ku disa prej vatrave edhe janë shuar.
Policia e Kosovës ka njoftuar se një person në fshatin Novosellë të Malishevës ka vdekur, pas përfshirjes së stallës së tij nga zjarri.
Përmes raportit 24 orësh, Policia ka bërë me dije se trupi i viktimës është dërguar në Institutin e Mjekësisë Ligjore. Malisheva është një prej komunave që është përfshirë nga zjarret.
Aktualisht situata më serioze është dhe në Bjeshkët e Rrugovës. FSK ka evakuuar banorët nga zonat ku zjarri ka arritur shumë afër shtëpive të banimit dhe po rrezikon jetën.
Banorët e kësaj treve kanë treguar për ‘Radio 1’ se, Ushtria e Kosovës së bashku me Policinë e Kosovës dhe me pjesëtarët amerikanë të KFOR-it, kanë larguar banorët e disa pjesëve të Rugovës ku zjarri i është afruar shumë shtëpive të banimit.
Ata janë nisur drejt qytetit të Pejës. Vatra të zjarrit janë hapur në zonën e Rugovës, ndërsa sipas banorëve atje, këtë herë flakët janë në afërsi të shtëpive.
Ndërkohë kryetari i Pejës, Gazmend Muhaxheri, ka bërë thirrje që vetëm personat zyrtarë të vizitojnë zonat ku zjarri nuk ka mundur të vihet nën kontroll.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
