Botimet për Diasporën janë tashmë pjesë e Digjitalizimit të Veprave Shqiptare. Platforma Digjitale e Veprave Shqiptare është krijuar me qëllimin e gjallërimit e promovimit të kujtesës kolektive kulturore të komunitetit të Diasporës shqiptare përmes letërsisë.
Nisur nga mungesa e shumë veprave të letërsisë shqiptare në format digjital, Fondi Shqiptar për Zhvillimin e Diasporës bën të mundur aksesimin e lirë, në çdo moment kohor dhe pavarësisht vendodhjes gjeografike, të disa prej veprave të autorëve më në zë të letërsisë shqiptare ndër vite. Digjitalizimit të veprave shqiptare i kushtohet një rëndësi e veçantë në Strategjinë Kombëtare për Diasporën, si një instrument për përcjelljen e trashëgimisë gjuhësore e kulturore shqipe ndër breza.
Seksioni i ri i Botimeve për Diasporën ka aktualisht të gjitha botimet e realizuara nga institucionet përkatëse për Diasporën. Linkun e seksionit mund ta gjeni këtu.
Sakaq, kujtojmë se Digjitalizimit të Veprave Shqiptare shumë shpejt do i shtohen edhe 13 autorë të rinj. Kjo vjen pas nënshkrimit të marrëveshjes mes Fondit Shqiptar për Zhvillimin e Diasporës dhe shtëpisë botuese “Toena”.
Marrëveshja parashikon blerjen e të drejtës së autorit për 13 vepra të autorëve shqiptarë, që do të digjitalizohen në platformën “Digjitalizimi i veprave letrare” në kuadër të projektit “Diaspora për zhvillim”.
Lexo edhe- Digjitalizimi i veprave të 13 autorëve, FZHDSH nënshkruan marrëveshjen
Veprat të cilat i shtohen fondit të Ueb-it “ADLD.AL” janë: Agim Vinca “Letër Zotit”, Dhimitër Shuteriqi “ Sytë e Simonidës”, Josif Papagjoni “Kur hëna digjej lart”, Majlinda Rama “Perandorët”, Namik Dokle “Vajzat e mjegullës”, Namik Dokle “Shën Maria e Beratit”, Niko Kacalidha “Eliksiri i gurit”, Odise Kote “Funerali i hijes”, Skënder Rusi “Digjen meteorë”, Skënder Rusi “Dhe prapë për ty më ndërrohet mendja”, Shefkije Islamaj “Mos më thuaj se më ke parë në ëndërr”, Viktor Canosinaj “Baronesha Shenteben”, Vojsava Nelo “Gruaja me të zeza”.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
