Grupi muzikor arbëresh SHEGA ka publikuar këngën e tyre të re këtë 30 korrik, “Niko”. Një këngë që flet për zemërimin, betejën dhe shpengimin e që fatkeqësisht publikohet në një ditë jo të mirë për arëbreshët.

E gjithë zona e Horës së Arbëreshëve është përfshirë nga zjarret që kërcënojnë edhe banesat.

“Asnjëherë nuk do ta kishim menduar të publikonim “Niko” në një ditë kaq të trishtuar për vendin tonë, me ajër të rëndë dhe shtëpi të mbuluara nga hiri.
Veprimet kriminale u koordinuan për t’i vënë zjarrin një pjese të madhe të Horës së Arbëreshëve, nga Portella della Ginestra në Pizzuta dhe shumë zona të tjera.
Niko është një këngë zemërimi, beteje por edhe shpengimi: sot i drejtohemi “pjesës tjetër” të kësaj toke, asaj që punon për një të ardhme tjetër. Klithma jonë e shpresës, e bindur se kjo forcë shkon përtej plagës së madhe.
O Niko, fuqi
me sy të ri”, shkruan grupi në postimin e këngës në rrjetet sociale.

SHEGA ka bërë të ditur se do të publikojnë albumin e tyre të parë, pjesë e së cilës është dhe “Niko” më 6 gusht.

Pjesë e këtij albumi pritet të jenë këngët “Drita”, “Lumturi” dhe “Arianne”, të cilat janë regjistruar gjatë muajit qershor në studio muzikore. Pesë të rinjtë arbëreshë nga ngulimi “Hora e Arbëreshëvet” janë bërë bashkë në sajë të pasionit për muzikën dhe për gjuhën e mëmës, të ruajtur prej gjashtë shekujsh.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.