Ata janë më shumë se motër e vëlla, janë miq të mirë dhe bashkëpunëtorë të kompanisë së tyre të prodhimeve kineaste.

Xhoana dhe Murat Lama ishin përkatësisht 5 dhe 3 vjeç kur u larguan nga Kavaja drejt Italisë me familjen e tyre.

Ata kanë rrëfyer historinë e tyre të emigrimit dhe të suksesit mes Milanos dhe Londrës për “Pasqyra Shqiptare”. Për 22 vite kanë jetuar në Itali dhe tashmë në Londër. Studimet e para i kanë nisur në Milano, ku Xhoana për shtatë vjet ka marrë studime kinematografike nga të cilat fitoi një brusë në Amerikën e Jugut dhe u rikthye në Itali për të marë diplomat. Të dy, vëlla e motër të pandashëm vendosën të shkonin në Londër para tre vitesh për të ecur përpara e për të vijuar atë që bënë me studimet. Krahas të motrës, Murati ka bërë dhe një kurs për modeling si një nga pasionet e tij krahas si producent dhe regjisor.

Ata rrëfejnë se çdo projekt e kanë bërë bashkë, filma me metrazh të shkurtër, dokumentarë, video promocionale. Duke qenë se Murati pëlqen modelimin kanë pasur dhe projekte ku producente ishte Xhoana dhe Murati modeli.

Vëlla e motër rrëfejnë vështirësitë e fillimit në Londër, ku dinin vetëm anglishten bazë dhe nuk kishin miq e nuk njihnin njeri. “Kur shkuam nga Shqipëria në Itali ishin prindërit tanë që u përballën me vështirësitë, ndërsa në Londër vështirësia ishte për ne për të pasur shtëpinë tonë. Prandaj kemi lidhje të fortë bashkë sepse gjithmonë jemi bashkë, punojmë bashkë, lëvizim bashkë”, thotë Xhoana.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.