Në sallën e senatit të shtetit italian u organizua më 12 korrik konferenca me titull “Roli i Papa Klementit XI për zgjimin e identitetit shqiptar dhe në kulturën italiane të kohës”.
Konferenca u inagurua nga Presidenti i Këshillit Papnor për Kulturën (=Ministër i Jashtëm) Kardinali Gianfranco Ravasi. Një mesazh përshëndetës dhe nga Presidentja e Senatit të Republikës italiane Maria Elisabeta Alberti Casellati.
Morën pjesë studiues të njohur arbëresh, shqiptarë si dhe italianë.Profesori arbëresh Françesco Altimari – Universiteti i Kalabrisë – solli studimin e tij me titull: Papa Albani për Rilindjen Kulturore shqiptare dhe arbëreshe”. Ndërsa Profesori shqiptar Gëzim Gurga nga Universiteti i Palermos : “Mësimi i Gjuhës shqipe nën Pontifikatin e Papës Albani”. Profesoresha italiane Carla De Bellis – Universiteti “La Sapienza” Romë: “Klementi XI dhe Akademitë Romake . Arti i Propagantës”.
Lexo edhe- “Malli i Arbërit” i arbëreshit Azzinari ekspozohet në senatin italian
Në përfundim artisti arbëresh Franco Azzinari prezantoi pikturën unike kushtuar Papës Françesku dhe takimit të tij imagjinar me Papa Klementin XI, titullar “Malli i Arbërit”.
Dy papë që kanë patur dhe kanë një dashuri e përkushtim ndaj popullit shqiptar e arbëresh. Kardinali Gianfranco Ravasi u shpreh se piktura do të vendoset në Vatikan.
E Ngarkuara me Punë e ambasadës së Shqipërisë në Vatikan, Majlinda Dodaj pohoi se kjo Konferencë shënon aktivitetin e parë i cili i paraprin aktiviteteve të tjera të cilat Ambasada e RSH-së në Vatikan ka në program përgjatë vitit 2021. “Këto manifestime – nënvizoi ajo – hapen pikërisht me Papa Klementin XI i cili udhëhoqi Kishën Katolike për 21 vjet, për të sjellë në vëmëndje lidhjet e lashta midis Vatikanit dhe Shqipërisë, interesimin e Klementit XI për popullin shqiptar e Shqipërinë e pushtuar nga turqit, përpjekjet për ruajtjen e identitetit, gjuhës shqipe dhe fesë katolike, por dhe kontributin e tij ne fushën e kulturës dhe të artit në përgjithësi”.
U kujtuan marrëdhëniet midis Vatikanit dhe Gjergj Kastriot Skënderbeut. U soll në vëmendje gjithashtu persekutimi i klerit katolik në Shqipëri gjatë sistemit komunist si dhe ndihmën e Vatikanit pas viteve 1991 deri më sot.
Lidhja e Shqipërisë dhe Vatikanit u forcua dhe nga vizita e dy Papëve: Papës Gjon Pali II në vitin 1993 dhe Papës Françesku në vitin 2014.
Aktiviteti u mbajt në kuadër të 30- vjetorit të vendosjes së marrëdhënieve diplomatike ndërmjet Selisë së Shenjtë dhe Shqipërisë, si dhe 300 vjetorit të vdekjes së papës me origjinë shqiptare Klementi XI.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
