Sopranoja shqiptare Arlinda Morava, ndër emrat më të vlerësuar të skenës operistike rumune, prej vitesh jeton dhe ka ndërtuar karrierën e saj në Rumani. Artistja shqiptare së fundmi është vlerësuar me çmimin Nderi i Qytetit nga kryetari i bashkisë së Orleans në Francë. Ajo në një intervistë rrëfen për jetën dhe karrierën e saj artistike.

Arlinda ka shkuar në Bukuresht që adoleshente në vitin 1997, jeton dhe gjithë karrierën e ka krijuar atje. Një periudhë u largua në Zvicër për studime, më pas ka punuar në Romë dhe ka bërë koncerte në shumë shtete, duke bërë turne me operën e Bukureshtit. Ajo është dhe atashe kulturore e ambasadës shqiptare në Rumani në promovimin e Shqipërisë duke treguar se kemi vlera shumë të rralla.

Sopranoja shqiptare thotë se lidhjet mes Rumanisë dhe Shqipërisë janë të hershme dhe na lidhin mjaft gjëra bashkë.

“Që në antikitet trakët me ilirët deri vonë, pavarësia jonë nga këtu mori rrugëtim. Shumë atdhetarë tanët kanë jetuar krijuar e bashkëpunuar me RUmaninë. Jemi dy vete që kemi vuajtur dhe kemi kaluar me dinjitet. Jemi dy vende që na lidhin shumë gjëra”, thotë Arlinda për “Dita jonë” në A2CNN.

Së fundmi ajo ka organizuar koncertin “Mbrëmje artistike” në Bukuresht. “Sapo mora dhe një çmim për këtë, më quajtën ambasadorja e muzikës në Rumani. Pata një koncert gjatë kësaj periudhe të vështirë për secilin artist. Rifilluam me forcë dhe sa munda të punojmë gjëja e parë që mendova është do mblidhemi të gjithë ne që jemi në Rumani, të etnive të ndryshme të bëjmë një koncert ku të tregojmë vlerat e secilit komb. Bëra një koncert me shumë artistë si mua, që jam nga Shqipëria, një tjetër nga Bullgaria, Mali i Zi etj. Interpretova tre pjesë shqiptare dhe dy pjesë arumune, sepse dihet që ne në Korçë kemi shumë arumun dhe Rumania gjithashtu. Gjëja më e bukur është që secili vend nga Ballkani nxori muzikën e bukur e të ëmbël dhe spektatori njohu nga afër dhe traditën e secilit vend”, tregoi ajo.

Arlinda rrëfeu dhe emocionet e marrjes së çmimit “Nderi i qytetit” nga bashkia e Orleans në Francë. “Ishim në delegacion me rumunët dhe pritja u bë e madhe. Ishte një kënaqësi, të pranishëm intelektuale dhe njerëz të elitës dhe isha ftuar për të kënduar nga pala rumune. Isha e vetme shqiptare”, rrëfeu Arlinda.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.