Dhoma e Biznesit të Diasporës Shqiptare fazën e dytë e Projektit “Angazhimi i Diasporës në transferimin e njohurive bujqësore në Shqipëri”, financuar nga IOM, do ta zhvillojë në terren duke mundësuar seminare me ekspertë. Këtë fundjavë do të jetë i pranishëm  eksperti i Shoqatës Italiane të Prodhuesve, Salvatore Armentano, i cili do të ofrojë përvojën e tij dhe një trajnim në terren që do të zhvillohet në Tiranë dhe Vlorë nga 18 deri në 20 Qershor dhe do të përqendrohet në kultivimin e ullirit.

Kompanive shqiptare që marrin pjesë në trajnim do t’u tregohet procesi i kujdesit për bimët, nga mbjellja e tyre deri në pjekurinë e plotë të ullinjve dhe shndërrimi më pas në vaj ulliri ekstra të virgjër. Bizneset bujqësore që janë anëtarë të AIC që i dedikohen këtij produkti kryesor të dietës mesdhetare kanë arritur nivel të lartë përsosmërie në disa rajone të Italisë Jugore dhe Qendrore.

Lexo edhe: Mundësi për Agrobizneset/ Dhoma e Biznesit të Diasporës sjell përvojën italiane

Salvatore Armentano është agronom dhe sipërmarrës bujqësor që jeton në Civita, një komunë e pakicës gjuhësore arbëreshe në Kalabri. Ai zgjodhi këtë rrugë karriere në një moshë shumë të re, duke u diplomuar në bujqësi dhe më vonë mori një diplomë në Shkencat Bujqësore në Universitetin e Bolonjës. Gjithashtu në Bolonjë ai fitoi kualifikimin e Teknikut të Kontrollit të Cilësisë në sektorin e pemëve dhe perimeve dhe u trajnua në fushën e sigurisë në vendin e punës. Më pas kryen një aktivitet të gjerë këshillimor agronomik dhe financiar për fermat kalabreze, ku jep mësim edhe në lëndën Edukimit Mjedisor në shkollat e mesme. Armentano ka qenë i përfshirë në hartimin dhe koordinimin e projekteve të ndryshme të Rajonit të Kalabrisë duke përdorur fonde evropiane për bujqësinë dhe në monitorimin e fermave të ullirit dhe fabrikave të prodhimit të vajit të ullirit në Kalabri. Ai ka punuar për më shumë se dhjetë vjet në AIC, ku merret me asistencë për fermat e bashkuara dhe komunat për masa strukturore dhe ndihmë të komunitetit. Ndjek veçanërisht zonën e Pollino dhe Piana di Sibari, ku përqendrimi i komuniteteve të pakicës gjuhësore arbëreshe dhe ndërmarrjeve bujqësore të drejtuara nga arbëreshët është më i madhi. Salvatore është shumë i lidhur me origjinën e tij dhe u angazhua në këtë projekt shkëmbimi të njohurive Itali-Shqipëri edhe për këtë arsye.

Lexo edhe: Dhoma e Biznesit të Diasporës trajnim për sipërmarrjet e Agrikulturës

Në ditët në vijim do t’ju informojmë më shumë me pamje filmike dhe fotografike për trajnimet e organizuara në plantacione ulliri dhe fabrikat e prodhimit të vajit të ullirit në Shqipëri.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.