Shqipëria zgjidhet anëtare e Këshillit të Sigurimit të OKB-së, 2022-2023 duke u mbështetur nga 175 vende anëtare të OKB. Në votim morën pjesë 190 vende.

Më herët ministrja Xhacka u shpreh se zgjedhja e Shqipërisë si vend anëtar i Këshillit të Sigurimit në Organizatën e Kombeve të Bashkuara me statusin e anëtarit jo të përhershëm është një mundësi e jashtëzakonshme.

“…për Shqipërinë vlen të thuhet që është një mundësi e jashtëzakonshme, patjetër prestigj për politikën e jashtme dhe për diplomacinë e saj por edhe një mundësi e jashtëzakonshme për të thelluar bashkëpunimin me partnerët dhe aleatët me të cilët ndajmë vlera dhe parime të njëjta, por edhe për të zgjeruar aktivitetin diplomatik të Shqipërisë përtej atyre kufijve që kemi pasur deri më sot, sigurisht të diktuara nga një agjendë që është shumë e madhe për të thënë globale sa i takon paqes dhe sigurisë në Këshillin e sigurimit…”, tha ajo një ditë më parë.

Asambleja e Përgjithshme e OKB votoi për 5 anëtarët e rinj jo të përhershëm: Shqipëria, Gaboni, Gana, Brazili dhe Emiratet e Bashkuara. Shqipëria shkoi në këtë votim si kandidaturë konsensuale e grupit të vendeve të Evropës Lindore.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.