Mjeku shqiptar në Londër, Dr. Adrian Fandi, mjek i urgjencës, në një intervistë tregon për situatën e koronavirusit në Britaninë e Madhe dhe mbi efektshmërinë e vaksinave. Ai flet edhe për sindromat post Covid. Mjeku shqiptar thekson se edhe pse kemi bërë vaksinën duhet të kemi kujdes, të vazhdojmë të respektojmë rregullat.

“Situata ka nisur të përkeqësohet pak, sepse është përhapur variant Indian. Kjo ndodhi para se të merreshin masat me karantinen e udhëtarëve që vinin nga India. Për fat të mirë nuk është vdekjeprurës, por numri i të infektuarve është rritur dhe sot flasim për 5000 raste në ditë, ndërkohë që 2-3 javë më parë ishin 1000-2000 raste. Dita për hapje totale duket ende e largët pr mua. Procesi i vaksinimit ka ndikuar në të gjithë vendet, kjo ka ndikuar shumë në uljen e numri të vdekjeve, sepse simptomat janë më të lehtë”, tregon mjeku Fandi.

“Në Britani nuk ekziston pasaporta e vaksinimit dhe kushdo që udhëton drejt Britanisë duhet të bëjnë karantinën, janë të gjithë njësoi para ligjit, si ata që janë vaksinuar edhe ata që nuk janë vaksinuar. Nëse do vazhdojmë kështu kam frikë se të gjithë bashkëatdhetarët e mi, bashkë me mua do jemi të privuar nga pushimeve në Shqipëri, sepse kur të kthehemi do të duhet të bëjmë 10 ditë karantinë dhe shumë teste”, shprehet Fandi.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.