Më 28 maj 1891 lindi Ali Këlcyra, pinjoll i familjes së shquar Këlcyra. Ishte udhëheqës në Luftën e Vlorës të vitit 1920, deputet, gazetar dhe jurist.

Ali Këlcyra shkruante dhe fliste rrjedhshëm frëngjishten, italishten dhe turqishten, ndërsa greqishten dhe gjermanishten i zotëronte mirë.

Në Kongresin e Lushnjes, Ali Këlcyra, delegati 29 vjeçar, nuk ishte vetëm pjesëmarrës, por diskutant i flaktë për të ardhmen e Shqipërisë, ka drejtuar regjistrimin e vullnetarëve në përkrahje të qeverisë së Sulejman Delvinës dhe njëkohësisht ka mbajtur me shpenzimet e veta Repartin e vullnetarëve të Këlcyrës.

Ali Këlcyra u zgjodh deputet i Gjirokastrës dhe u bë i njohur në Shqipëri për fjalën e tij të shkëlqyer dhe për elokuencat më të shquara, thotë Eqrem Bej Vlora, ishte orator i shkëlqyer.

Të studiosh për jetën dhe veprën e këtij patrioti të ndritur, por sikur vetëm të lexosh për jetën dhe veprën e tij të përkushtuar, kupton se ke të bësh me një patriot të madh, me një erudit në Jurisprudencë, në gjuhësi, në politikë, në histori, në diplomaci dhe më gjerë.

Ali Këlcyra me të drejtë thoshte se përmbi ideologjitë qëndron interesi i shenjtë dhe nderi i atdheut, ai mbi të gjitha vlerësonte shqiptarizmin dhe për këtë punoi dhe luftoi.

U largua nga Shqipëria në vitin 1944, ndërkohë që vendi po kalonte nën regjimin komunist. Jetoi kryesisht në Romë, ku edhe vdiq më 24 shtator të vitit 1963. Sot eshtrat e tij prehen në vendlindje.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.