Në kuadër të masave anti-COVID Autoritetet shëndetësore bullgare kanë vendosur që hyrja në Bullgari e shtetasve të huaj të jetë e mundur me paraqitjen e një prej dokumenteve të mëposhtme:

Certifikatës së vaksinimit, ku përcaktohet marrja e dozave të caktuara dhe të kenë kaluar 14 ditë nga marrja e dozës së fundit. Vaksinat e pranuara nga pala bullgare janë: Pfizer-Biontech, AstraZeneca AB, SK Bioscience Co Ltd, Moderna, Janssen-Cillag International NV, Serum Institute of India, Sinopharm, Sinovac Biotech Ltd, Sputnik V. Certifikata duhet të përmbajë të dhënat e sakta të personit si në dokumentet e identifikimit, datat e kryerjes së dozave të vaksinave, llojin e vaksinës, emrin e prodhuesit, shtetin e lëshimit dhe institucionin.

Një dokumenti, që tregon shërimin nga Covid-19. Dokumenti duhet të kryhet në periudhën nga dita e 15-të në ditën e 180-të. Dokumenti duhet të përmbajë të dhënat e nevojshme mjekësore të qytetarit.

Me paraqitjen e përgjigjes negative të një testi PCR, të kryer 72 orët e fundit ose të një testi antigjen, të kryer 48 orë para hyrjes në Bullgari.

Ambasada Shqiptare në Sofje bën më dije se këto rregulla vlejnë edhe për qytetarët shqiptarë, të cilët mund të hyjnë në Bullgari me paraqitjen e një prej dokumenteve të mësipërme.

Nga data 1 maj 2021, është ndaluar përkohësisht hyrja në Bullgari e shtetasve, që vijnë nga India, Bangladeshi, Brazili si dhe vendet dhe territoret në Afrikë. Përjashtim nga ky kufizim bëjnë shtetasit bullgarë dhe personat me leje qëndrimi të përhershme, afatgjatë ose të vazhdueshëm në Bullgari dhe anëtarët e familjeve të tyre, të cilët i nënshtrohen karantinës 10-ditore.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.