Motra Detina dhe Argita Zalli, shkencëtare në Britani, kanë nisur një nismë në ndihmë të pacientëve të sëmurë me tumor. Kjo nismë quhet “Afërdita ime”.
Janë shumë arsye të forta nga e gjithë kjo nismë, arsye të forta personale dhe ndjenjë e fortë humanitare. Nëna e tyre po përballet me sëmundjen e kancerit. Të dyja vajzat po e ndjejnë në lëkurë se çfarë do të thotë që një familjar, një njeri zemre të përballet me të. E dinë çfarë kalon personi dhe gjithë familja, ndaj ndjejnë një përgjegjësi të fortë morale për të mbështetur këdo që ndodhet në të njëjtën betejë me to.
Duan të ndihmojnë një komunitet të caktuar nga ku marrin mesazhe çdo ditë për këshilla dhe mbështetje: Personat dhe familjarët e tyre që përballen me Kancerin.
“E kemi quajtur Afërdita ime, sepse mami jonë është një paciente që vuan nga kanceri dhe ajo quhet Afërdita, dhe ne duam të japim sadopak kontributin tonë për të ndihmuar sa më shumë njerëz”, shprehet Detina Zalli në emisionin “Dita Jonë” në A2.
Kjo është një nismë e cila sjell së bashku vlera të Humanizmit, Solidaritetit dhe Mbështetjes së komunitetit nëpërmjet Vullnetarizmit.
“Është shumë e rëndësishme që familjarët të jenë të informuar se çfarë kalojnë familjarët e tyre me kancer. Ne marrim shumë mesazhe nga familjarë të ndryshëm për ti ndihmuar. Ndaj vendosëm të marrim këtë nismë, në mënyrë që informacioni të jetë zyrtar dhe kushdo të mund të bëhet pjesë e këtyre takimeve të përmuajshëm” shprehet Argita Zalli.
Takimet do të zhvillohen çdo të shtunë të parë të muajit tek Qendra Sociale Multidisiplinare në Tiranë, pranë bulevardit Zogu i Parë: “Ne do të kemi një qendër ku të gjitha mund të mblidhen, falë bashkëpunimit me Bashkinë e Tiranës. Në takime do të ndajmë histori motivuese me persona që e kanë mposhtur sëmundjen e kancerit. Mbështetja psikologjike, informacioni janë vërtetë të rëndësishme në sfidën me këtë sëmundje”, vijon Argita.
“Ne do të jemi online dhe do të përgjigjemi për të gjitha përgjigjet që njerëzit do të kenë. Kur të kemi mundësi, sigurisht që do të jemi edhe fizikisht. Do mundohemi që në lidhje online të kemi mjekët më të mirë të onkologjisë, për tí këshilluar në mënyra të ndryshme. Duke nisur nga këshillat për dietat, sepse persona të sëmurë me kancer kur bëjnë rreze është shumë e rëndësishme të kenë një dietë ushqimore shumë të rregullt” tregon Detina Zalli për “A2 Televizion”.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
