Qendra Kulturore Shqiptaro – Amerikane në Riverdale New Jersey, ka zgjedhur Astrit Zhaku si kryetarin e saj të tre vitet e ardhshme, pas një procesi të rregullt votimi në qendër.

Duke shprehur falënderimin në rrjetet sociale Zhaku ka bërë të ditur edhe vizionin e tij për të ardhmen e shoqatës.

“Përmes këtij mesazhi dua që t’ju njoftoj me programin tim lidhur me QKSHA, ambiciet dhe qëllimin e kandidaturës sime për të udhëhequr me organizatën tonë. Ky institucion është i shenjtë për komunitetin tonë, sepse të gjithë e dimë me sa shumë mund dhe sakrificë është ngritur që nga dita e parë duke i rezistuar kohës dhe stuhive të ndryshme që janë shfaqur jo rrallë herë”. Organizata jonë është shtëpia jonë e përbashkët, e barabartë dhe e hapur për të gjithë ne, në çdo kohë dhe në çdo rast. Pra ky është synimi im i parë. Të hapim dyert e organizatës për komunitetin tonë, anëtarët dhe dashamirët pa përjashtim. Kjo qendër u ngrit nga ju dhe u takon vetëm Ju, ndërsa kryesitë dhe kryetarët që marrin përsipër të udhëheqin me këtë subjekt, janë në shërbim të këtij komuniteti, pa përjashtim, në çdo kohë dhe në çdo rast. Unë zotohem për këtë dhe ne bashkë mund t’ja dalim” shkruan ai.

Qendra Kulturore Shqiptaro-Amerikane në Riverdale New Jersey mbledh rreth vetes mërgimtarët nga Struga, dhe zonat përreth saj dhe është një ndër më të zellshmet dhe më të zëshmet në Mërgatën Shqiptare. Për dekada të tëra në SHBA, i ka shërbyer më së shumti çështjes shqiptare, Kosovës, dhe lirisë e të drejtave të shqiptarëve, në Maqedoni, Mal të zi, dhe Luginën e Preshevës, si dhe çështjes çame në Diasporë.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.