Nga dita e sotme në Zvicër janë lehtësuar disa nga masat anti-Covid. Më datë 14 prill 2021, Këshilli Federal i Zvicrës paraqiti planet për të rihapur vendin pavarësisht situatës së rënduar epidemiologjike.

Me lehtësimin e masave do të lejohen ngjarje me pjesëmarrje të lartë dhe spektatorë, do të hapen stadiumet, kinematë, teatrot dhe do të lejohen koncertet.

Gjithashtu do të hapen baret dhe restorantet, por klientët duhet të respektojnë një rregullore të caktuar, duke hequr maskën vetëm për të konsumuar ushqime dhe pije, si dhe nuk lejohen më shumë se katër persona në një tavolinë. Tavolinat duhet të kenë një largësi prej 1.5 metrash ose të kenë një ekran të vendosur ndërmjet tyre. Ndërsa klubet dhe diskotekat duhet të qëndrojnë të mbyllura.

Sipas qeverisë, situata epidemiologjike mbetet e pasigurt dhe ka vazhduar të përkeqësohet në javët e fundit. Katër nga pesë treguesit epidemiologjikë për rihapjen aktualisht nuk janë përmbushur, por pranimet në spital po rriten relativisht ngadalë në krahasim me numrin e rasteve të infeksionit dhe situata në njësitë e kujdesit intensiv është relativisht e qëndrueshme.

Në vlerësimin e tij, Këshilli Federal gjithashtu mori parasysh ndikimin social dhe ekonomik të masave, veçanërisht tek të rinjtë.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.