Shifrat zyrtare nga Banka e Shqipërisë tregojnë se të ardhurat e shtetasve që jetojnë jashtë Shqipërisë gjatë vitit 2020, atë të pandemisë, prekën shifrën e 673 milionë eurove, nga rreth 702 mln euro që ishin gjatë vitit paraardhës, pra në rënie me 4.3% në terma vjetorë. Krahasuar me vitet e tjera paraardhëse ndërkohë, pra përpara 2019-ës, kjo shifër rezulton të jetë më e lartë, çka sinjalizon se të paktën në këtë aspekt, kriza nuk ka pasur një ndikim të madh. Madje, duke pasur parasysh edhe faktin se kriza e shkaktuar nga pandemia ka goditur rëndë ekonominë globale dhe atë personale të emigrantëve që punojnë dhe jetojnë jashtë vendit, sidomos në Europë, rënia e lehtë e të ardhurave nga emigrantët në 2020-ën mund të shihet me optimizëm.
Madje, ajo që vihet re është edhe fakti se tremujori i fundit i vitit të kaluar ka regjistruar një rekord, prej 202 mln euro të ardhurash nga emigrantët, që është edhe shifra më e lartë që prej vitit 2009. Përpara krizës financiare të viteve 2012-2013 dërgesat e emigrantëve ishin në nivele më të larta se periudha pas krizës. Tremujori i tretë i vitit 2020 ndërkohë regjistron fluksion më të lartë të të ardhurave nga emigrantët që prej vitit 2008./Nga “Scan Intelligence Unit”
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
