Epidemiologia shqiptare, Rubina Muzina, e cila punon në Teksas të Shteteve të Bashkuara të Amerikës, foli në “Ditari” në A2 mbi procesin e vaksinimit në botë, por veçanërisht në Shqipëri.
Muzina theksoi se “vaksina më e mirë është ajo që ke në dispozicion ta marrësh”. Sipas saj, vaksinat nuk duhet të vlerësohen vetëm nga efikasiteti i tyre.
“Vaksina është një sukses shumë i madh. Unë jam e gëzuar kur shoh shqiptarët që vaksinohen. Kur janë vaksinat në fazën klinike, grupet ku ato testohen janë shumë të vogla. Studimet klinike janë ndërkombëtare.
Vaksina më e mirë është ajo që ke në dispozicion ta marrësh. Mos krahasoni vaksinat kokë më kokë. Asnjëherë nuk është bërë një studim i tillë. Ne kapemi tek efikasiteti. Nëse kapemi vetëm tek efikasiteti, ajo nuk na tregon tablonë e plotë. I them mjekëve shqiptarë, epidemiologëve dhe popullit shqiptar, të bëjnë 2-3 hapa mbrapa, le të shikojmë figurën e plotë. Por kush është figura e plotë e vaksinës kineze? Nga mosha 35-59 vjeç janë bërë studimet klinike, ku efikasiteti ka dalë 50 për qind. Por, unë mund të them që këto testime janë bërë në Brazil, në kohën kur varianti i tmerrshëm brazilian P1, i cili është një variant i tmerrshëm që shkakton edhe riinfektime. E dyta, është bërë te grupi i punonjësve shëndetësorë ku nuk mund të gjesh 60-70-vjeçarë. E treta, OBSH-ja është në fazat e fundit të vlerësimit të vaksinës. E katërta, është vaksinë “tradicionale” edhe pse nuk më pëlqen ta përdor këtë, por Pfizer dhe Moderna u aprovuan në nëntor dhe dhjetor në SHBA, por në nëntor ne nuk kishim variante. Astrazeneza, efektiviteti i kësaj vaksine është vetëm 10 për qind te varianti i Afrikës së Jugut. Pra, nuk mund të vendosim vetëm nga efikasiteti se sa e mirë është një vaksinë. Unë sërish e them vaksinohuni me vaksinën që keni në dispozicion”.
Por vaksina kineze nuk është miratuar nga EMA apo FDA? “Unë binda prindin tim që të vaksinohej me vaksinën kineze. Ne punojmë me të dyja, por këto janë kompani farmaceutike, të cilët nuk kanë kërkuar aprovim në SHBA apo komunitetin Europian. Ne nuk mund të kërkojmë certifikim për ato vaksina që nuk do të jenë në tregun e tyre”, u shpreh mjekja shqiptare.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
