Vota e Diasporës nuk u bë e mundur për zgjedhjet e 25 prillit dhe sipas ministrit të Shtetit për Diasporës Pandeli Majko shkak për këtë ishte vonesa nga ana e Partisë Demokratike për të sjellë propozimet e saj.

I ftuar në “Repolitix” në Report TV, z. Majko tha se gabimi nisi që në fillim kur nisi prodhimi i pasaportave dhe kartave ID vite më parë, ku shqiptarët jashtë vendit si adresë banimi deklaronin atë të prindërve në Shqipëri.

“Gabimi që në fillim kur nisën pasaportat dhe kartat. Një pjesë e madhe e njerëzve që banonin jashtë vendit si adresë banimi vinin adresën që kishin në Tiranë Durrës, atë të babait e mamasë dhe jo adresën e banimit jashtë vendit. Në esencë ku qëndron problemi? Ne kushtet që opozita mund të ketë besim të plasaritur për arsye të qëndrimit për një kohë të gjatë jashtë sistemit, ta konsiderojë këtë numër të kufizuar adresash që plotësojnë të gjitha kushtet ligjore për të votuar si shtetas jashtë vendit për aplikimin e të drejtës së votës jashtë vendit. Parimisht u ra dakord, dhe që në janar në KQZ kanë qenë dokumentet gati. Për arsye të mos realizimit të konsensusit, kryetari i KQZ gjeti një arsyetim diplomatik, se ligjor nuk është, dhe iu drejtua me letër partive politike. Kodi nuk të thotë që për çdo vendimmarrje tu drejtohesh partive politike. Po mendoj se u la një kohë e mjaftueshme. U ulëm dy herë me përfaqësues të opozitës dhe organizatave të Diasporës që kanë dhënë ndihmë të jashtëzakonshme, menduam që në një moment të caktuar e zgjidhëm, e do kishim kaluar aktet nënligjore. PD kërkoi 48 orë për të dhënë përgjigje fundore, pritëm 48 orë dhe pritëm dy javë, tre javë dhe akoma s’ka ardhur përgjigja”, tha ministri i Shtetit për Diasporën.

Ai iu referua dhe deklaratës së kreut të PD-së Lulzim Basha sipas të cilit maxhoranca bëri hile me votën e Diasporës. “Sot me deklaratë PD dhe kryetar i PD tha që maxhoranca bëqri hile. Se ku është kjo hilja unë nuk e di. Unë po të isha në opozitë sot do bëja namin, do e shpallja qeverinë më frikacake që kërkon të hyje në Europe pa aplikuar minimalisht votën e shqiptarëve jashtë vendit. Dhe nuk janë as shumë vota. Kur ti ke frikë të fusësh në sistem kaq pak vota mendo nesër që do hyjnë në sistem 100 mijë apo 400 mijë vota sepse janë gati gjysmë milioni. Ajo që ka funksionuar mendoj se nisja e procesit do konsiderohej si sukses i qeverisë së PS, sic e thatë ju”, tha më tej ai.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.