Certifikata Digjitale e Gjelbër është propozimi i Komisionit Europian për të lehtësuar lëvizjen e sigurt brenda vendeve të BE-së gjatë pandemisë së COVID-19.

Aurora Allushaj, gazetarja shqiptare në Bruksel thotë se ideja erdhi nga Greqia në dhjetor të vitit të shkuar për të shpëtuar industrinë e saj të turizmit që është shtyllë kryesore e ekonomisë.

“Ideja e certifikatës së gjelbër është rikthimi disi në normalitet i rikthimeve në punë apo dhe për turizëm gjatë kësaj vere. Ka pasur disa kundërshtime nga ekspertë të BE-së, por dhe nga shtete si Belgjika e Franca, pasi marrja e një apo dy dozave të vaksinimit, nuk do të thotë se nuk mund të infektohesh apo nuk do të jesh automatiksht përcjellës i COVID-19. Iniciatore e kësaj ideje ka qenë Greqia e cila që në 12 dhjetorin e vitit të kaluar ia ka kërkuar BE-së të miratojë një certifikatë të standardizuar për ti dhënë frymëmarrje industrisë së turizmit nga e cila varet ekonomia e saj”, tha ajo në “Wake Up” në Top Channel.

Ajo shpjegon dhe se çfarë do të përmbajë kjo certifikatë që nga të dhënat personale e deri tek lloji i vakinës që është bërë.

“Certifikata jeshile do të lëshohet nga një platformë që do të jetë online brenda muajit qershor. Elementët që do të përfshihen në të do të jenë të dhënat e personit, data e lindjes, vendbanimi, certifikata e vaksinimit, nëse do të jetë i vaksinuar, llojin e vaksinës së përdorur, vendin dhe dozën e injektimit. Në rast se personi nuk do të jetë i vaksinuar do të jetë certifikata e testit negativ. Në rast se personi ka kaluar COVID-19 brenda 180 ditësh nga momenti që do të udhëtojë, do të ketë këtë vërtetim. Ky sistem do të jetë valid për sa kohë OBSH nuk do ta shpallë pandeminë të zhdukur”, tha Aurora.

Për vendet që nuk janë në BE, ku përfshihet dhe Shqipëria, KE u ka kërkuar që të njohin sistemin e digjitalizimit të certifikatave për të hequr pengesat për shtetas europianë që udhëtojnë drejt këtyre vendeve.

“Komisioni Europian bën thirrje të gjithë vendeve të treta të njohë sistemin e digjitalizimit të certifikatave në mënyrë që dhe ato të heqin pengesat për shtetasit europianë që duan të udhëtojnë në vende si Shqipëria për shembull, që nuk është në BE. Nëse do të marrim rastin e Shqipërisë, nëse një shtetas shqiptar do të udhëtojë në Europë, ky shtetas do ti kërkojë vendit ku do të udhëtojë të pajiset me certifikatën jeshile”, përfundoi Aurora.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.