Nën patronazhin e Ambasadës së Kosovës komuniteti shqiptaro-australian në Melburn dhe ai në Dandenong organizuan një tubim përkujtimor kushtuar Epopesë së UÇK-së. Fillimisht me një minutë heshtje u nderuan viktimat e familjes Jashari si dhe të gjithë ata që derdhen gjakun e tyre për lirinë dhe pavarësinë e Kosovës.
Ishte kryetari i Komunitetetit shqiptaro-australian në Dandenog-Keshava, z. Riza Jaupi i cili përshëndeti të pranishmit dhe ju uroi mirëseardhjen në lagjen më të banuar shqiptare në Diasporë – Dandenong, ndërsa në fjalën e tij ambasadori i Republikës së Kosovës në Australi dhe Zelanden e Re dr. Hajdin Abazi falenderoi të gjithë shqiptarët e Australisë të cilët u mobilizuan si kurrë më parë për t’i dalë krahë atdheut dhe për të ndihmuar luftën e Ushtrisë Çlirimtare të Kosovës. 23 vjetori i Epopesë së UÇK-së, një ngjarje historike e cila na ka zgjuar kombëtarisht, na ka vitalizuar dhe na ka lidhur edhe më shumë me njëri-tjetrin. Epopeja e Ushtrisë Clirimtare të Kosovës na bëri të ndihemi me shumë se kurrë, vëllezër dhe motra prej gjaku dhe kombi si një kundërveprim për pushtuesit që donin të na përçanin. Kur flasim për Epopenë e UÇK-së ne mendojmë për familjen Jashari, për komandantin legjendar Adem, për Hamzën dhe për bacën Shaban por edhe për të gjitha viktimat të rënë për liri në fushëbeteja por edhe shumë prej tyre të masakruar në mbi katërqind masakra ku rreth trembëdhjetë mijë shqiptare civile të pafajshëm humbën jetën, një mijë e treqind prej tyre ishin fëmijë dhe mbi njëzetë mijë gra dhe vajza kosovare të dhunuar. Lufta e UCK-së nuk ishte një luftë vetëm e Kosovës por e mbarë shqiptarisë sepse atë e ndihmuan të gjithë shqiptarët nga katër anët e botës dhe këtë e dëshmuan dhe ushtarët e UÇK-së në llogore që I pati prej gjithë andej. Këtë luftë e përkrahën dhe tre besimet fetare të cilët qëndruan krah për krah në mbrojtje të atdheut. Kjo lufte nuk do të ishte e sukseshme pa ndihmën e Diasporës, ndër ta jeni dhe ju shqiptarët e Australisë që sot Kosova si një shtet sovran dhe i pavarur ju është shumë mirënjohës për kontributin tuaj madhështor.
23 Marsi do të shënojë dhe ndërhyrjen e SHBA-së dhe NATO-së në bombardimin e Serbisë, ku bota demokratike ishte e detyruar të përdor këtë si mënyre të fundit për të ndaluar regjimin agresues të Serbisë.
Në këtë tubim mori pjesë dhe dr. Edmond Trako i cili në fjalimin e tij tha se kjo është një ceremoni e paharrueshme për të dhe që si e tillë me bije rasti ta përjetoj për herë të parë dhe jam tepër i kënaqur që jam në mesin tuaj dhe krah për krah me kolegun mikun dhe ish luftëtarin e ushtrisë çlirimtare të Kosovës ambasadorin dr. Hajdin Abazi.
Lufta e UÇK-se ka qenë një luftë për liri, dhe një luftë për tu mbrojtur nga një regjim i cili ka ushtruar një dhunë sistematike ndaj popullatës autoktone shqiptare në Kosovë. Këtë e dëshmoi dhe bota demokratike, SHBA-ja dhe aleatet e saj me ndërhyrjen ushtarake për ti dhënë fund këtij terrori ndaj popullatës së pafajshme të Kosovës.
Duartrokitjet më të mëdha i fitoji vogëlushja Vlera Selimi e cila e veshur me rrobat ushtarake të UÇK-së interpretoi këngën e komandatit legjendar Adem Jashari, ndërsa më vonë në skenë u paraqitën përfaqësues të shoqatave të ndryshme si dhe ish drejtues të komunitetit ku një ndër ta dhe z. Alil Musai i cili e udhëhoqi komunitetin në kohën e luftës, një periudhë e veshtirë por që mblodhëm forca për tu mobilizuar dhe jo vetëm që ndihmuan UÇK- në dhe popullin Kosovar por edhe strehuam mbi katër mijë refugjat kosovar në bashkëpunim me qeverinë Australiane. Kjo punë e komunitetit u vlerësua edhe nga parlamenti i shtetit Victoria ku komuniteti shqiptare u zgjodh komuniteti më i aftë i asaj kohe.
Profesor Shaip Lloga tha se na u desh të luftojmë kundër një propagande të madhe anti shqiptare që luante Serbia këtu në Australi dhe besoj se ia dolëm me sukses sepse këtë e deshmoi dhe vet njohja e menjëhershme e Kosovës nga Australia si shtet i pavarur, kurse kryetari aktual i komunitetit z. Sezar Jakupi foli për rolin e diasporës shqiptare qysh prej viteve ’80, për demonstratat e shumta të organizuara jo vetëm këtu në Melburn por edhe para Parlamentit federal në Canberra, ndërsa vitet ’90 dhe ndihmat financiare të grumbulluara për të ndihmuar luftën e UCK-së u shndërruan në një bashkim kombëtar i të gjithë Shqiptarëve. Po ashtu në skenë u paraqitën dhe shumë aktivistë të tjerë si z. Besnik Krasniqi i cili udhëhoqi radio programin e komunitetit për 20 vite dhe djali i aktivistit të dalluar për rezistencën kombëtare Metush Krasniqi, aktivisti i vjetër i komunitetit dhe sekretar i shoqatës së pensionistëve dhe ish antar i shoqatës Bajram Curri z. Pajazit Ibraimi si dhe kryetari i KF Prishtina z. Driton Maliku.
Ndërsa me tregimin e saj emocionues zonja Ilira Bytyqi si femër e vetme e kryesisë së komunitetit të asaj kohe tregoi për ngjarjen tragjike ku në luftën për liri bien babai dhe vëllai I saj, një moment tragjik që tronditi mbarë komunitetin por në të njëjtën kohë që forcoji dhe unifikoji në fushatën e grumbullimit të mjeteve financiare dhe ushqimore për Kosovën.
Më në fund në shenjë faleminderimi ambasadori dr. Hajdin Abazi dekoroji me nga një mirënjohje një numër të madh aktivistësh dhe shoqata për rolin e tyre gjatë luftës së Kosovës, kjo është një vazhdimësi e mirënjohjeve të ndara në fillim dhe do të vazhdojë të mirënjohë çdo shqiptarë që ka dhënë dhe kontributin me të vogël për ndihmën e Kosovës tha ai.
Në shenjë të 8 Marsit ditës ndërkombëtare të gruas, të gjitha grave dhe vajzave të pranishme ju dhuruan lule në shenjë falenderimi, respekti dhe dashurie nga ferma e luleve ‘Five ways flowers’ në pronsi të z. Bujar Maliku.
Fundi i kësaj mbremje i takoj rapsodit muzikor Adem Gjoshi i cili me grupin e tij me sharki dhe çifteli kënduan disa këngë patriotike kushtuar komandantit legjendar Adem Jashari dhe heronjve të rënë në luftën për liri të Kosovës.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
