Në kuadër të aktiviteve të shumta të organizuara në Puglia të Italisë mbi 30 vjetorin e eksodit shqiptar, është edhe hapja e ekspozitës së fotografit Fate Velaj. Gjatë inagurimit të kësaj ekspozite Kryeministri Edi Rama u shpreh: “Të flasësh për Fate Velaj nuk është e lehtë”.
Ekspozita e Fate Velaj dëshmon për lidhjen e fortë midis artistit shqiptar dhe rajonit të Puglias, në brigjet e të cilit ai zbarkoi në 1991 gjatë eksodit të parë nga Shqipëria.
Nuk është e lehtë të thuash nëse Fate Velaj është më shumë fotograf apo piktor, më shumë shkrimtar apo politikan dhe diplomat. Velaj ka fituar çmime të shumta ndërkombëtare. Fotografitë e tij do të jenë në qendër të një ekspozite të titulluar “Portrete, përtej identitetit”, ekspozitë e cila është inaguruar ditën e sotme në orën 11 e 30 në sallën e ekspozitës së muzeut arkeologjik, “Francesco Ribezzo”, në Brindisi.
Fytyrat e kapura nga lentet e Fate Velaj tregojnë identitete dhe përvoja nostalgjike që tejkalojnë përvojën personale të subjekteve të fotografuar dhe i referohen konteksteve gjeo-politike nga të cilat shfaqen personazhet e tij si nga ëndrrat dhe makthet në kërkim të Europës, por përsëri, me identitetin e vet.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.