Sami Musa është deputeti i parë me origjinë shqiptare në Hamburg të Gjermanisë. Ai u pë pjesë e parlamentit pasi fitoi besimin e qytetarëve të zgjedhjet e vitit 2020. Të shumtë ishin shqiptarët që i besuan votën bashkatdhetarit tyre. Sami Musa tregon se përvoja e tij në institucionet e Hamburgut daton shumë më herët, pasi ai që prej vitit 2014 deri në 2019-ën ka shërbyer si këshilltarë në Komunë.
Ju jeni deputeti i parë me origjinë shqiptare në Hamburg, si e fituat besimin e qytetarëve në zgjedhjet Parlamentare të vitit 2020?
Së pari, ju falenderoj përzemërsisht për këtë intervistë!
Unë jam me origjinë nga komuna Viti e fshatit Pozheran të Kosovës nga ana e babait, por kam lindur në Hamburg.
Angazhimi im politik ka filluar që para 10 vitesh, por për herë të parë unë kandidova për t’u përfaqësuar në parlamentin e Hamburgut, qytetarët që më besuan me votë. Një pjesë shumë e madhe e tyre janë shqiptarë. Për këtë iu jam shumë mirënjohës të gjithë miqve dhe bashkëpunëtorëve të shumtë që u angazhuan gjatë fushatës zgjedhore dhe më së shumti qytetarëve shqiptarë. Kjo për mua përveçse është një kënaqësi, është edhe një përgjegjësi për të përfaqësuar dhe ndërlidhur temat e qytetarëve me instancat më të larta shtetërore në Hamburg.
E parë në një retrospektivë, kam vënë re se njerëzit kanë nevojë për njerëz të cilët janë prezent dhe të arritshëm për problemet e tyre. Kjo ka qenë dhe është motoja ime:
Të jem i arritshëm për qytetarët që kërkojnë bashkëbisedim me mua për çështjet e tyre.
A ishte e vështirë të bëheshit pjesë e politikës gjermane?
Futja ime në politikë i ka rrënjët që para shumë viteve, në partinë Socialdemokrate, SPD, në komunën e Harburgut.
Në 2014 kam qenë si këshilltar dhe kam shërbyer në komunën e Harburgut deri në 2019. Aty përveçse kam punuar me kënaqësi, kam mësuar dhe kam marrë eksperienca të vlefshme. Besoj se, nëse ke dëshirë të ndryshosh gjëra për komunitetin që të rrethon dhe përpiqesh pozitivisht për këtë qëllim, nuk është e vështirë. Por padyshim, që të kesh rezultate të mira duhet shumë punë dhe shumë përgatitje. Gjatë mandatit tim si këshilltar në komunën e Harburgut kam parë si funksionon në realitet politika. Jam përballur me pikat e forta dhe të dobëta të saj. Ajo që unë iu kam premtuar dhe iu premtoj zgjedhësve të mi është se unë do të jem një njeri i thjeshtë dhe në dispozicion për një dialog real me ta, do t’i mbështes propozimet e tyre dhe do t’i paraqes në institucionet përkatëse.
Ju jeni zgjedhur në komisionin ‘Eingabeausschuss‘ (Komisioni Direkt i Bashkisë së Hamburgut). Përse zgjodhët pikërisht këtë komision?
“Komisioni Direkt i Bashkisë së Hamburgut’” merret me problemet e drejtpërdrejta të qytetarëve, ndaj e ndjeva të arsyeshme të jem pjesë e këtij komisioni. Ne përpiqemi të kuptojmë dhe t‘iu japim zgjidhje individuale me bazë ligjore problemeve të shumta njerëzve, mes tyre edhe plot shqiptarëve të cilëve me kënaqësi iu vijmë për ndihmë.
Ju jeni gjithashtu edhe në komisionin ‘Europa Ausschuss’, çfarë roli keni ju aty?
Në komisionin ‘Europa Ausschuss’ Hamburgu është në partneritet me Chicago, Marsillie, Léon, St. Petersburg, Shangai, Pragë, Osaka, Dar es Salaam dhe Dresden. Unë jam përfaqsues për forcimin e mardhënieve me qytetin e Drezdenit. Ky partneritet ka karakterin e bashkëpunimit të mirë për çështje që prekin të dy qytetet së bashku. Sidoqoftë, ky partneritet i qyteteve mundëson gjithashtu shkëmbime reciproke dhe bashkëpunime të ndryshme.
Në 2022 do të festohet 35 vjetori i binjakëzimit Hamburg-Drezden, ku unë jam përgjegjës për organizimin e këtij eventi. Gjithashtu në këtë komision jam përgjegjës për vendosjen e urave të bashkëpunimit me vendet e Ballkanit Perëndimor për shqyrtimin e çështjeve të në këtë rajon.
Është një mundësi shumë e mirë për t‘u njohur dhe për t‘u bashkuar me vende të tjera, që të ndikojmë në forcimin e lidhjeve me ndërmarrjeve të ndryshme të politikave të cilat zhvillojnë marrëdhënie ekonomike dhe kulturore midis vendeve.
Gjithashtu ju jeni përfaqësues në “Komisionin Familje, Fëmijë dhe të rinj”. Çfarë funksioni ka ky komision?
Unë jam vetë baba i një vajze 3-vjeçare, e cila ka moshë kopshti. Pikërisht ky komision është pak më i veçantë sepse ka të bëjë drejtpërdrejt me familjet dhe fëmijët. Unë mora mandatin në fillim të vitit 2020 dhe kjo përkon me fillimin e pandemisë së Covid-19. Ashtu si edhe shumë njerëzve në fusha të tjera, pandemia e ka bërë jetën tonë të vështirë duke na vënë përballë vështirësive të shumta, por ne jemi duke u përpjekur për të bërë më të mirën për qytetarët.
Në vitin 2020 kemi ofruar asistencë për plotësimet e formularëve për sunvencionimin e restoranteve dhe bareve të cilat u mbyllen nga pandemia. Ne si staf kemi mundësuar informacionet e nevojshme në shqip për ata të cilët kanë hapur rishtas aktivitetet e tyre.
Ne jemi në kontakt të vazhdueshëm me, prindërit, njerëzit, gastronomë, dhe njerëz të fushave të tjera. Takimet i zhvillojmë në platforma online ku dëgjojmë dhe marrim parasysh ankesat dhe sugjerimet e tyre për të gjetur zgjidhje dhe kompromise të përshtatshme për të gjithë. Ne jemi përpjekur me çdo kusht që t’i mbajmë shkollat edhe kopshtet hapur sa më gjatë që të jetë e mundur. Edhe pse sinjalet nga Bundestagu na vinin më herët për ‘Lockdoën‘. Po kështu jam përpjekur që dhe që edukatorët të kalojnë në radhët e para të vaksinimit kundër Koronavirusit.
Ne si SPD donim dhe duam t‘u qëndrojmë familjeve pranë duke iu lehtësuar sadopak peshën. Qeveria ka dhënë opsion punën nga shtëpia ‘Home Office‘, ose përkujdesjen e fëmijës së tyre, ndërsa për prindërit që punojnë në profesione relevante si mjekë, infermierë, përkujdesjes për të moshuarit, policë, zjarrfikës, shitës etj., e kanë një vend të sigurt përkujdesjeje për fëmijët në shkolla dhe kopshte. Kjo periudhë është shumë e vështirë për prindërit të cilëve ua kuptoj plotësisht shqetësimet që na solli kjo pandemi.
Nëse numri i infektimeve ulet, pritet një lehtësim i kushteve në lidhje me shkollat dhe kopshtet.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
