“Biznesi përtej kufijve dhe rrjetëzimi i biznesit të Diasporës shqiptare” ishte tema e diskutimit në takimin online të organizuar ditën e sotme nga Dhoma e Biznesit të Diasporës.
Të pranishmit diskutuan mbi sipërmarrjen e Diasporës shqiptare dhe integrimi i tregjeve të përbashkëta, por dhe mentorimit në universitetet shqiptare. Disa nga tematikat kryesore që u trajtuan në këtë forum ishin: Sipërmarrja e Diasporës shqiptare dhe integrimi i tregjeve të përbashkëta, si të bësh biznes me Diasporën shqiptare përtej kufijve, mundësitë e biznesit dhe thirrjet për bashkëpunim etj.
Në këtë kohë të vështirë pandemie u diskutua mbi tre drejtimet kryesore të paketës ndihmëse, e orientuar te individi, te biznesi dhe suporti për shëndetësinë. Ndërkombëtarëzimi i biznesit u cilësua si mjaft i rëndësishëm dhe madje dhe ai rajonal. Rrjetëzimi i SME-ve të Diasporës në rajon gjithashtu ka një rëndësi të veçantë dhe bizneset e Diasporës jo vetëm në Shqipëri, por dhe në rajon, Kosovë, Maqedoninë e Veriut e Malin e Zi ato duhet të mbështesin njëra-tjetrën kur bëhet fjalë për mënyrën si furnizohen tregjet.
Në takim u parashtrua ideja e një dritareje unike për investimet e Diasporës dhe me shërbimin ndaj tyre. Investimet e Diasporës në Shqipëri kanë qenë në dy drejtime thithjen e investimeve dhe pjesa e arsimit shqip në Diasporë, pasi lidhja me universitetet u konsiderua si një potencial.
Një shembull konkret i bashkëpunimit të Diasporës në vend ishte ai i sipërmarrësit shqiptar në Francë Gazmend Toska. Ai tha se industria ka rol të rëndësishëm pasi është e pamundur të rilokalizohen të gjithë proceset e industrisë. Toska foli për një model ekonomik për investimin e tij në Shqipëri, duke e quajtur patriotizëm ekonomik.
“Në 2005 vendosa të bëj një investim të vogël në Berat, që është qyteti im i lindjes, por në Shqipëri ka problem guvernance, shtet e administratë. Këtë zbulova para 15 vitesh dhe modeli im ekonomik është i zbatuar në atë që në perëndim quhet opatriotizmi ekonomik. Unë në Shqipëri vetëm eksportoj, nuk marr kurrë pjesë në tender, koncesione etj etj., vetëm eksportoj. Karakteristikë e dytë e metodës sime të patriotizmit ekonomik është që fitimet unë i lë në Shqipëri. Prej 15 vitesh nuk kam marr një qindarkë dhe ato shkojnë ose në zhvillimin e aktivitetit, në 10 vitet e fundit kam investuar 5 milionë euro. Aktiviteti im në Berat punëson 250 veta. Një pjesë e fitimeve shkon në një fondacion që operon në fusha të ndryshme, japim rreth 15 mijë vakte në vit për të varfrit në Berat, qendra “Porta e Hapur”, vijnë 50 veta që ushqehen. Që prej COVID jepen ushqime të gatshme. Kemi dhënë me dhjetëra bursa fëmijëve pa prindër ose të varfër. Jam i lumtur që prej 2 vitesh i kam dhënë një jetë të re një muzeu që quhet muzeu i Solomonit i hapur nga një mësues beratas”, tha ndër të tjera z. Toska.
Një tjetër aspekt që u prek ishte edhe kontributi i Diasporës në arsim përmes intershipeve duke ndërthurur kështu teorinë në shkolla me praktikën.
“Dhoma e Biznesit është pjesa e parë ku janë ndërmarrë një sërë aktivitetesh dhe projektesh. Për Këshillin Koordinues janë përfaqësues nga Europa dhe Amerika. Ajo që ne duam është të mbështesim dhe stimulojmë biznesin që për mendimin tim, që krijon hapësira më të mira bashkëpunimi mes diasporës dhe vendit por dhe stimulon rritjen dhe prodhimin në vend. Ka shumë aspekte të tjera, sa stimulon ky biznes ekonominë e vendit, rritjen e punësimit, që janë aspekte të rëndësishme. Gjithashtu, stimulimi i start up-eve dhe ndërlidhja që në fazat prioritare të masterave apo diplomave në universitet. Ka shumë iniciativa në Shqipëri”, tha Anila Smorgrav anëtare e KKD, përfaqësuese e komunitetit shqiptar në Francë.
Martin Serreqi, zv. dekan i fakultetit të Ekonomisë i cili ka studiuar në SHBA dhe u kthye në Shqipëri për të dhënë për studentët shqiptarë atë që ka mësuar atje.
Ai thotë se Diaspora është një partner adapt përsa i përket intershipeve. “Intershipi dhe Diaspora është një partner i mundshëm dhe shumë adapt. Fokusi i tretë të krijojmë një program partneriteti mes anëtarëve të dhomës dhe për pedagogët dhe kombinimi i ideve akademike me zbatimin në praktikë një lob që funksionon kudo”, tha ai.
Në takim u hodh ideja që shqiptarët e Diasporës të regjistrohen pranë Dhomës së Biznesit të Diasporës si mentor për universitetet.
Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.
