Laboratori i Fonetikës pranë katedrës së Gjuhës Shqipe të Universitetin e Tiranës ka marrë emrin e gjuhëtarit të shquar arbëresh Giovanni Belluscio, i cili me mikrofonin dhe regjistruesin e tij të zërave ka mbledhur me dhjetëra dëshmi të gjalla të të folmeve arbëreshe dhe atyre të viseve shqiptare.

Këtë lajm e bën të ditur me anë të një postimi Prof. dr. Aljula Jubani, kolege dhe bashkëpunëtore e Belluscios, të cilin e përkujton me shprehjet e tij mbi mbresat e Shqipërisë, të shprehura në një nga shkrimet e tij më të njohura me titull: ““Çë kur të lashë, nani të shoh”: “… në gusht të vitit 1983, kam hyrë për herë të parë në Shqipëri.

Nga mbërritja e Arbëreshëve, domethënë të parët e mi, në Italinë e Jugut, vetëm disa bashkëfshatarë, ushtarë të trupave, kishin shkuar në Shqipëri, ishin kthyer në tokën e të parëve të tyre në fillim të viteve 1940: Angelo Bellizzi (alias Pallatèri),… më ka treguar për Tiranën, malet që e rrethonin, kujtonte Sahatin (kulla e sahatit) në sheshin Skanderbej dhe gazetën Tomori… Ëndrra ishte të shkleja në tokën prej nga kishin ikur etërit e mi.” Belluscio humbi jetën vitin e shkuar, duke u ndarë para kohe nga kjo jetë në të cilën kishte realizuar shumë punime të vlefshme për shkencat albanologjike e shumë të tjera që mbeten vetëm në projekt.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.