Qeveria kanadeze ka ndërmarrë një nismë për të krijuar një grup vullnetarësh për të shpërndarë informacione lidhur me COVID-19. Ky informacion do të përpunohet e publikohet nga një grup shkencëtarësh kanadezë për të luftuar dezinformimin në lidhje me situatën.

Pjesë e kësaj nisme vullnetare janë bërë dhe shqiptarë, një prej tyre është edhe Blerina Kadiu, stomatologe e profesion e cila pas përfundimit të studimeve në Tiranë, përfundoi dhe masterin në Seneca.

Blerina tregon për “Diaspora Shqiptare” se zgjodhi të bëhej pjesë e grupit dhe se postimet të cilat do të bëhet në anglisht në grupin “Science up first” ka marrë përsipër ti bëj një përmbledhje në shqip duke i bashkëlidhur dhe informacionin origjinal për ata që nuk kanë njohur të gjuhës angleze.

“Unë plotësova një aplikim online që përfshinte të gjitha moshat dhe profesionet dhe ata përzgjedhin personat që mund të ndihmojnë në fusha të caktuara. Grupi që do të publikojë informacionin #ScienceUpFirst është një grup i pavarur shkencëtarësh, mjekësh dhe komunikuesish që janë bashkuar – për të luftuar kundër përhapjes së dezinformacionit në lidhje me COVID-19”, thotë Blerina.

Publikimet do të nisin nga 25 janari 2021.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.