Artisti shqiptar Alfred Mirashi, i njohur me emrin e artit Milot, është bërë pjesë e ekspozitës së parë të Bienales Ndërkombëtare të Jinan, në provincën e Shandong, Kinë. Ekspozita është inauguruar në 12 Dhjetor 2020 dhe do të qëndrojë e hapur deri më 31 Mars 2021.
Artisti Miloti shkruan në rrjetet e tij sociale se kjo ekspozitë është vizituar nga 10 njerëz në ditë: “Sot në Bienalen, Jinan, 10 mijë vizitorë në një ditë.”
Kina tashmë ndryshe nga pjesa tjetër e botës lejon zhvillimin e aktiviteteve të ndryshme edhe me pjesëmarrje masive. Pavarësisht se pandemia konsiderohet si e shkuar, të gjithë vizitorët kanë respektuar me rigorizitet masat anti-COVID.
Lexo edhe: Itali/ Miloti, artisti që po lë “gjurmë” ndërkombëtare me çelësin e tij
Ndër punimet e 100 artistëve nga mbi 20 vende, janë edhe dy veprat e Milotit, i cili është i pranishëm në këtë bienale me dy vepra pikturale të krijuara në 2017: Këndi Mesdhetar dhe Këndi oriental . Këto janë dy kanavacë të mëdha, me një strukturë diptiku: në një seksion dy fytyra antike të statujës janë portretizuar në plan të parë – njëra perëndimore, tjetra lindore -, seksioni tjetër është një vazhdim i përbërësve që veprojnë si sfond në të parën, me penelata intensive dhe forma gjeometrike me ngjyra të lehta, blu dhe bruz, duke alternuar me një okër të ngrohtë dhe portokalli.