Juliana Shalla me origjinë nga Librazhdi është integruar mjaft mirë në shoqërinë e vendit ku jeton dhe jep mësim në gjuhën angeleze për shtetasit shqiptarë. Gjithashtu prej tri vitesh Juliana merret me zbulimin e talenteve të rinj shqiptarë në Angli, “Albanian Future Stars” dhe me promovimin e artistëve të rinj “Albanian Artists of Diaspora”.
Juliana Shalla tregon për “Diaspora Shqiptare” se të integrohesh në një vend të huaj është e domosdoshme të mësosh gjuhën e vendit ku jeton, por kjo nuk do të thotë se duhet të mohojmë origjinën dhe gjuhën tonë.
Ju keni studiuar për gjuhë të huaj në Elbasan. A ishin studimet për gjuhën angleze një nga arsyet që ju vendosët të për t’u larguar në Angli?
Në fakt ishte fati që na bëri të emigrojmë pasi çdo gjë çfarë kisha filluar në Shqipëri i kisha të gjitha pasi fillova punë si mësuese e gjuhës angleze, por atë periudhë jam njohur me njeriun e jetës dhe ai jetonte atë kohë në Itali pasi u martuam u shpërngulëm në Angli! Një arsye tjetër që unë vazhdova edhe këtu t’i përkushtohem mësimdhënies ishte pikërisht duke kujtuar sakrificat dhe vështirësitë që kalova gjatë viteve të studimit për shkak të kushteve jo të mira që kisha dhe ajo më ka dhënë më shumë forcë dhe të mos heq dorë edhe këtu nga profesioni im, pasi di së çfarë vështirësish kam hasur dikur.
Në Angli nuk keni hequr dorë nga mësimdhënia dhe jepni mësim të gjuhës angleze për shtetasit shqiptar?
Puna ime parësore është mësimdhënia, pra atë që lash në Shqipëri e vazhdova në Britani, pra nuk hoqa dorë dhe jap mësim studentëve shqiptarë. Bëj kurse të gjuhëz angleze dhe i ndihmojë me regjistrimet për në universitetet dhe kolegjet Britanike.
Sa e rëndësishme është gjuha për t’u integruar në shoqërinë e vendit ku jeton?
Të integruarit këtu është vërtetë e vështirë pasi pa gjuhën angleze është vështirë të gjesh një punë të zanatit që ke pasur në Shqipëri apo kudo!
Unë kisha fatin që kisha studiuar gjuhën angleze në Shqipëri, por shumë nga shqiptarët hasin shumë vështirësi dhe në mungesë të njohurive të gjuhës bëjnë punë të rënda dhe jo të profesioneve të tyre. Ndaj edhe unë kam marrë këtë nismë të zhvilloj kurse të gjuhës angleze në mënyrë që ti ndihmojë të integrohen sa më shpejt dhe të vazhdojnë studimet në universitete që shteti i përkrah nga ana financiare! Ka pafund studentë që regjistrohen në kursin e anglishtes dhe pastaj duke mësuar gjuhën janë të aftë të ndjekin edhe universitetin.
Sa ndryshojnë mundësitë për ata persona që arrijnë të përvetësojnë gjuhën?
Ndryshojnë shumë pasi ju krijohen mundësi për punë, sepse ashtu si ne shqiptarët karakterizohemi, jepemi 100% në atë çfarë ne bëjmë. Mund të veçoj rastin e një studenti që kishte kryer studimet shkëlqyeshëm në Itali për avokat, dhe tani pas përmirësimit të gjuhës angleze kaloi provimin e anglishtes dhe vazhdon 1 vit master dhe ndërkohë punon edhe si vullnetare në një zyrë avokatie!
A janë të shumtë shqiptarët pa dokumente dhe sa e vështirë është jetesa pa dokumente?
Po ka shumë që janë pa dokumente, dhe për shkak të kësaj humbin të drejtën për të kryer studimet që i mundëson shteti, apo kurset falas të gjuhës angleze, ndjekjen e kolegjeve etj. Të them të drejtën kjo situatë më bën të ndihem keq dhe jam për pjekur me sa kam mundësi tu ndihmojë atyre që të mësojnë gjuhën dhe të integrohen. Pra e kanë një derë shqiptare të hapur ku mund të trokasin!
Ju prej sa vitesh jetoni në Angli?
Unë prej 5 vitesh jetoj në Angli dhe do i jepja një këshillë të gjithëve duke i thënë të mos dorëzohen para vështirësive të fillimit, por të kërkojnë gjithmonë më të mirën nga vetja.
Krahas punës tuaj të përditshme dhe angazhimit në mësimdhënie ju punoni edhe për zbulimin e talenteve shqiptarë në Britani. Na tregoni disa detaje se si organizohet puna juaj për zbulimin dhe promovimin e tyre?
Me zbulimin e talenteve shqiptare në Britani kam filluar në vitin 2018 ku duke punuar në shkolla shqiptare hasa mjaft fëmijë të talentuar dhe mendova të organizoj një konkurs ku të shfaqnin talentin e tyre dhe audicioni parë ishte vërtet mbresëlënës pasi kishte shumë talente dhe në të njëjtën kohë kjo shërbeu edhe për të njohur sa më shumë familje shqiptare dhe fëmijët të krijonin shoqëri të reja me fëmijët e të njëjtit vend pra të Shqipërisë. Audicioni i parë për talentet shqiptare ishte vërtet mbresëlënës ku ishin rreth 400 spektatorë në sallë. Kishim jurinë me disa këngëtarë dhe koreografë dhe aktorë të cilët votonin fëmijët nga çdo kategori!
Më pas u organizua audicioni dytë të cilin e quajta “Albanian Future Stars” dhe ishte sërish i njëjti interesim për fëmijët dhe prindërit tashmë për shkak të pandemisë u organizua online nga ku u përfshin edhe talente nga Shqipëria, Kosova, Maqedonia, dhe ngado kishte talente shqiptare në Diasporë dhe sigurisht talentet shqiptare në Angli!
Gjithashtu për shkak të këtyre organizimeve kam krijuar edhe një grup me artistë të Diasporës titulluar “Albanian Artists of Diaspora” ku promovohen artistët shqiptarë kudo ndodhen në Diasporë dhe për festat e fundvitit kanë krijuar një këngë “Miqësi dhe Shpresë” me tekstin e një autoreje e cila jeton në Londër, Alma Mehmeti dhe kompozitor i mirënjohur i cili jeton në Londër gjithashtu Gëzim Shkreli dhe montazhi i këngës i bërë nga një artist i ri në Itali, Den Joca.
Cilat janë sukseset që këta fëmijë kanë arritur deri më sot?
Majat më të larta që disa nga talentet kanë arritur deri tani ka qenë pjesëmarrja në konkurset ndërkombëtare ku janë votuar nga juri me deri 40 anëtarë nga gjithë bota. Dhe shumica kanë ardhur me fitore dhe kjo na ka bërë shumë të lumtur të gjithëve dhe shumë krenarë ku talentet Shqiptare vlerësohen me pikë maksimale dhe organizatorët ju kanë bërë ftesa për të marrë pjesë falas në organizimet a ardhshme në Francë, Itali , Armeni,Turqi etj..
Çfarë ndjesie merrni kur talentet shqiptarë rrëmbejnë një çmim, ose kur ju vetë zbuloni një talent që arrin më pas të promovohet me sukses në kompeticione të rëndësishme?
Ndjesia kur talentet shqiptarë rrëmbejnë çmimet e para është e jashtëzakonshme ashtu si ndihen ata vetë dhe prindërit e tyre pasi është një arritje për të gjithë ne kur shohim flamurin tonë mes flamujve të botës. Dhe do doja të përmend një rastësi kur një organizatore nga Bullgaria, Rumiana Nacheva, më përzgjodhi si anëtare jurie vetëm për faktin se i kish lënë mbresa shumë të mira këngëtarja Elhaida Dani gjatë një pjesëmarrje në Bullgari.
Çfarë projektesh keni për vitin 2021 nëse pandemia nuk do të bëhet pengesë?
Projektet e rradhës janë të shumta pasi të kalojë pandemia, por gjatë kësaj kohë kam dëshirë të organizoj sërish një konkurs online pasi edhe fëmijët dalin pak nga monotonia e përditshme, por këtë herë kam dëshirë të kem pjesëmarrje nga Shqipëria dhe kushdo që dëshiron i mirëpresim të kontaktojnë në faqen e “Facebook Albanian Future Stars”!
Ktheheni shpesh në Shqipëri dhe çfarë ju mungon më shumë?
Po Shqipërinë e vizitoj rreth dy herë në vit, sigurisht më mungon familja ime atje dhe gjithë shoqëria dhe të afërmit e mi, më mungon atdheu ndaj edhe këtu në këtë Londër të largët po mundohem të krijoj një strehëz të vogël Shqipërie, pasi vetëm ne që jetojmë larg atdheut e dimë sa dhemb që jemi larg saj!
