Sipërmarrësi shqiptar Geri Çupi ka lindur në Peshkopi dhe është rritur në Tiranë. Më pas ka studiuar në Oxford. Momentalisht jeton dhe ushtron aktivitetin e tij prej disa vitesh në Londër. Ai është bashkëthemelues i kompanisë “MonoChain” dhe në vitin 2018 kompania e tij zgjeroi aktivitetin në Shtetet e Bashkuara të Amerikës. Gjatë vitit 2020, 28 vjeçari shqiptar u konsiderua nga revista “Forbes”, si një nga të rinjtë më vizionar dhe të suksesshëm nën moshën 30 vjeçare.
Ai tregon për punën e kompanisë së tij dhe emocionet kur mori lajmin për vlerësimin në revistën ndërkombëtare. “Sigurisht që jam ndjerë krenar për vlerësimin, por të gjitha rezultatet janë arritur me punën e madhe të shumë viteve. Kjo mundësi më hapi shumë dyer dhe bëri të mundur të krijoja lidhje të reja profesionale. Komuniteti shqiptar në Londër është i gjerë dhe unë vazhdimisht bashkëpunoj me ta, përfshirë dhe babain e këngëtares Dua Lipa”,- tregon sipërmarrësi i suksesshëm në një intervistë për “Vizioni i Pasdites”.
“Viti 2020 nuk ka qenë aspak një vit i lehtë, por lajmi që u bëra pjesë e “Forbes” ka qenë vërtet një lajm shumë i bukur për mua. Ka qenë një moment që unë jam ndjerë shumë krenar, por sigurisht që në karrierën time ka pasur dhe shumë arritje të tjera që më ccuan deri tek ky vlerësim nga revista “Forbes”. Për shumë vite kam punuar shumë dhe mbase ky ishte një vlerësim për punën time. Në punën time kemi një projekt për të verifikuar një product nëse është fals ose original dhe kjo ishte arsye që Forbes pikasi këtë ide që ishte vërtet innovative. Ne si kompani “MonoChain” kemi marrë shumë cmime. Në industrinë ku kompania jonë është e fokusuar mund të themi se jemi ndër liderët botëror”, rrëfen Geri Çupi.
