Gazeta italiane “Artmagazine” ka publikuar një intervistë me artisti italo-shqiptar Alfred Mirashi Milot. Në këtë intervistë artisti shqiptar tregon për jetën, rrugëtimin e tij artistik dhe projektet në vazhdim. Ai flet për kërkimin e tij artistik sa te piktura, skulptura e deri te instalacionet, si dhe temën e çelsit, temë e cila ndeshet shpesh në veprat e tij.
“Me siguri gjëja e parë që tërheq menjëherë vëmendjen kur flet me Alfred Mirashi Milot, një artist me origjinë shqiptare, i lindur në 1969, është sinqeriteti i tij në përcjelljen pikërisht të asaj që ai mendon pa shumë formalizma, energjinë që del nga çdo fjalë e pasion për artin që përfaqëson forcën e tij dhe forcën shtytëse për të shkuar përpara gjithsesi dhe gjithmonë, madje edhe përballë vështirësive. Ishte ky pasion që e shtyu Milotin nga Durrësi në 1991, në bordin e një anije me mbi 5,000 njerëz, drejt Italisë. Kërkimi artistik i Milotit lëviz në gjuhë të ndryshme duke filluar nga piktura te skulptura, te instalimet e mëdha, duke bërë që sugjerime të ndryshme kulturore të bashkëjetojnë në një ekuilibër perfekt”, e nis shkrimin gazeta “Artmagazine”.
Teksa gazetari Italian e pyet për projektet për vitin 2021 Miloti tregon se ka shumë projekte: “Aktualisht është duke u zhvilluar një projekt për Avellino. Presidenti i provincës, Domenico Biancardi, më ofroi vërtet një mundësi të shkëlqyer. Do të bëj një çelës që do të jetë skulptura më e madhe në Evropë e të gjitha kohërave (50 metra). Përurimi është planifikuar për në fund të Marsit, në fillim të Prillit 2021. Sidoqoftë, projekti është gati. Në fillim të janarit, hekuri dhe betoni do të vendosen në shesh. Është paksa një lloj Kolosi i Rodosit. Por gjithashtu si ëndrra e një fëmije që mendon se po bën gjëra gjigante. Unë jetoj në Firence përpara Kupolës së Brunelleschi dhe Këmbanës së Giotto-s, në Piazza Duomo, dhe sa herë që shikoj këto mrekulli, mendoj se edhe unë duhet të bëj diçka kolosale. Unë po kryej projektin për Avellino në një kohë kur bota është mbyllur, kur frika na ka paralizuar dhe shkatërruar vetëvlerësimin tonë. Prandaj kjo skulpturë dëshiron të jetë një mesazh shprese, paqeje dhe solidariteti. Italia ka qenë gjithmonë një vend ku takohen kultura të ndryshme. Ky çelës përfaqëson hapjen, pranimin dhe shkëmbimin, që do të thotë pasuri. Krahasimi me tjetrin është shumë i rëndësishëm. Ai gjithashtu dëshiron të jetë një dëshirë që të gjithë të mund të gjejnë çelësin për arritjen e qëllimeve të tyre, jo vetëm në art, por edhe në jetën e përditshme.
Një tjetër projekt i ardhshëm është në Kinë. Unë isha i ftuar nga Muzeu Jinan në Shandong City për të bërë një skulpturë 30 metra. Por do të diskutohet në 2021”, përfundon Miloti.
