Hava Bekteshi është shqiptarja e parë e cila ka futur çiftelinë në Filharmonin e Hamburgut.
“Në Elbphilharmonie, në Hamburg jam paraqitur me çifteli nën tingujt e këngës sime të bukur shqipe “Tingellon teli i Çiftelisë“! Kështu, çiftelia është parë e dëgjuar për herë të parë në një koncert të tillë madhështor”, shprehet Hava Bekteshi.
Hava Bekteshi është një ekonomiste nga qyteti Neustadt afër Hamburgut, Gjermani. Ajo ka emigruar nga Maqedonia në Gjermani, me prindërit, kur ka qenë vajzë 14 vjeçe.
Muzika autoktone shqiptare dhe instrumenti më i njohur shqiptar, çiftelia, ka qenë gjithmonë pjesë përbërëse e kohës së lirë në shtëpinë ku Hava është rritur. Në këtë mënyrë ky instrument është bërë që nga fëmijëria e hershme mjet për shprehjen e ndjenjave, mallit e dhembjes, edhe për Havën.
Me kohë, çiftelia e saj ka kaluar muret e shtëpisë dhe të familjes së saj, duke zënë gjithnjë më shumë vend edhe në shkolla, orkestra, mese artistësh, dhe kudo ku ekonomistja shqiptare ka gjetur mundësinë për ta bërë të njohur këtë pjesë të traditës shqiptare.
“Kur erdhëm në Gjermani gjithmonë kisha dëshirë të bëja diçka, të lëvizja. Derisa gjeta veten dhe u përshtata formula një grup kulturore artistike që quhej “Mërgimtarët”. Ishte një grup mjaft i kultivuar, por më pas grupi u prish dhe unë bëra një ndalesë sepse nisa studimet. Çiftelia mbeti si një pasion. Më pas mendoj se ishte çështje fati, tek zona ku banoja jetonin shumë komunitete dhe disa gjermanë kishin ardhur me idenë të formojnë një festival dhe donin të gjenin dikë që të prezantojë muzikë shqipe. Nuk e di se ku e kishin dëgjuar se unë luaja muzikë, por më kontaktuan. Si fillim isha shumë skeptike, më pas pranova dhe këtu nisi gjithçka. Ishte ajo rrugë ku unë kuptova se çiftelie mund të bëhet pjesë edhe një publiku gjerman. Performanca e parë para publikut gjerman ishte vërtetë një moment që mendoja askush sdo e pëlqejë, por në fakt atyre i pëlqeu shumë. Më pas projektet sollën projektet. Më pas mora pjesë në “Neë Hamburg Festival” dhe aty kurioziteti ishte i madh dhe isha e mirëpritur dhe çiftelie u pëlqye. Më pas më shkroi një organizatore për koncertin Filharmonia dhe unë konkurova. U prezantova bashkë me instrumentin tonë çiftelinë, ata më pas më pranuan. Regjizorja duke parë që unë gjithmonë merja çiftelinë me vete vendosi që çiftelia të bëhej pjesë e instrumenteve në koncert.”
Hava Bekteshi tregon gjithashtu projektet e shumta ku ka marrë pjesë: “Kam marrë pjesë në festivale të ndryshme, në bashkëpunime me muzicientë të zhanreve të ndryshme ku gjithmonë e kam përfshirë çiftelinë. Pastaj kam zhvilluar projekte me nxënës gjermanë, projekte në teatëro, si në Teatrin Gjerman “Deutsches Schauspielhaus” por dhe jashtë Gjermanisë, në qyettet si Venedik, Lyon, etj.”.
Teksa flet për fundvitin ajo shprehet se shpreson se 2021 do jetë një vit më I mbarë.
“Ky vit na mësoi shumë gjëra dhe na sprovoi shumë, duke bërë që të të kuptojmë vlerën e shumë gjërave. Ndaj shpresojmë që viti 2021 të jetë më i mbarë dhe i begatë.”
