Një grup sipërmarrësish shqiptarë në Zvicër, së bashku me Ambasadën e Republikës së Shqipërisë në Konfederatën Zvicerane, si dhe me mbështetjen e Dhomës së Tregtisë së Kantonit të Gjenevës organizuan sot ceremoninë inauguruese të Dhomës së Tregtisë Shqipëri-Zvicër (ALSWISS).
Në ceremoninë e inaugurimit ishte i pranishëm dhe përshëndeti, Kryetar i Parlamentit të Kantonit e Republikës së Gjenevës François Lefort, Kryetari i Dhomës së Tregtisë së Gjenevës Vincent Subilia si dhe Ambasadori i RSH, në Bern Ilir Gjoni.
Themelimi i ALSWISS përbën një moment të rëndësishëm në marrëdhëniet ekonomike mes dy vendeve. Realizimi i saj u bë i mundur falë angazhimit dhe punës së bashkërenduar mes përfaqësuesve të bizneseve shqiptare në Zvicër e Shqipëri, diplomatëve të Ambasadës shqiptare në Bernë dhe mbështetjes së pakursyer të Dhomës së Tregtisë së Gjenevës.
“Krijimi i ALSWISS pikërisht në këtë situatë të vështirë është një shembull shprese dhe do të shërbejë si gjeneratore e energjive dhe mundësive të reja që i ofrohen bizneseve shqiptare e zvicerane. Ajo do të jetë një derë e hapur dhe një instrument i vyer në duart e bizneseve shqiptare që dëshirojnë të realizojnë këmbime tregtare e ekonomike mes Shqipërisë dhe Zvicrës”, shkruhet në faqen e ambasadës.
