Sipërmarrësi shqiptar në Gjermani, Ilir Blakcoi tregon se si biznesi po kalon vështirësi për shkak të situatës së krijuar nga Covid-19. Në një intervistë në emisionin “Shqipëria Live” ku u diskutua sot vendimi i kancelares gjermane, Angela Merkel, për rivendosjen e karantinës totale duke nisur nga sot, 16 dhjetor, në një lidhje “Skype” nga Gjermania biznesmeni shqiptar i cili menaxhon një biznes familjar në Gjermani, tregon se aktualisht biznesi tij është mbyllur.

Pavarësisht problemeve ekonomike që shkakton mbyllja, ai u shpreh se ishte një vendim i drejtë dhe i rregullt, edhe pse biznesi i tij është i mbyllur.

“Janë marrë masa shumë të forta për shkak të pandemisë. Për sa i përket biznesit tim, është mbyllur si gjithë bizneset e tjera. Nga ana e shtetit gjerman ne do të ndihmohemi në bazë të të ardhurave të viteve të fundit. Marrim një shumë aq sa për të mos falimentuar bizneset që menaxhojmë. Të gjithë punëtorët që janë të punësuar në biznese, do t’i kalojmë në një kohë pune të shkurtuar dhe do i paguajmë, dhe lekët do i marrim nga qeveria. Kjo është me një përqindje sipas pagesave që paguaj punëtorët. Nëse unë paguaj një punëtor me 1500 euro në muaj, unë atë shumë duhet t’ia paguaj punëtorit. Pagesat sociale, sigurimet, mua më paguhen të gjitha mbrapsht nga qeveria. Unë u kam kaluar punëtorët në zyrën e punës dhe kjo e fundit dërgon lekët dhe unë i kam paguar punëtorët. Është shumë vendim i rregullt, e përshëndes si vendim, pasi po bëhet që të ndihmojnë të gjithë për të dalë sa më mirë nga kjo pandemi”, tha Blaçkori.

Për t’u bërë pjesë e grupit të “Gazeta Diaspora Shqiptare” mjafton të klikoni: Join Group dhe kërkesa do t’ju aprovohet menjëherë.