Emigracioni ka vështirësitë e veta dhe rruga e shtruar nuk ka qenë as për shqiptarët që kanë bërë emër në vendet ku kanë emigruar.

Këtë mund të themi dhe për balerinin e njohur shqiptar Kledi Kadiu i cili në një rrëfim për “Dita e re” në Ora News ka folur mbi mbërritjen në Itali gjatë viteve ’90, mallin për familjen, vështirësitë dhe forca për të ecur para.

“Në Itali ishin sakrifica të tjera, sakrifica larg prindërve në moshë shumë të re, eksperienca e parë që nuk dije si ta përballoje jetën e një emigranti në fillimet e saja. Punimet e ndryshme jo vetëm në zanat por dhe në punë të tjera për ti bërë ballë jetës. Kam punuar si murator, ndihmonim personat që kishin nevojë për të ndërtuar. Ja gjithë këto janë sakrifica, por këmbëngulja dhe pasioni qe ke për zanatin kalon çdo gjë dhe sot të duken sikur ke kaluar një urë me shumë pengesa të vogla”, shprehet balerini.

Për Kledin sakrificat dhe vështirësitë që kalon njeriu në jetë e bëjnë atë të dijë vlerën e suksesit dhe të ketë një mendim krejt tjetër për të ardhmen.

“Besoj se kjo është një nga mënyrat si e koncepton dhe jetën e ardhshme. Sepse një person që ka kaluar një urë me mundime të mëdha nga të gjitha aspektet ka një mendim të ndryshëm sa i përket suksesit dhe jetës aktuale”, tha balerini shqiptar.