Akademiku Kristo Frashëri ishte një nga figurat më të rëndësishmë të studimeve historike e albanologjike. Ai lindi si sot 100 vite më parë më 4 dhjetor të vitit 1920 në Stamboll të Turqisë dhe ishte pinjoll i familjes së patriotëve Frashëri.
Kristo Frashëri ka një prodhimtari shkencore që mbulon një periudhë mbi 80-vjeçare.
Që nga viti 1938, kur ka botuar shkrimin e tij modest mbi Jeronim de Radën, ka botuar me dhjetëra artikuj studimorë, referate historike, vëllime dokumentare dhe monografi shkencore, që trajtojnë pa përjashtim ngjarje, personalitete dhe procese të historisë së Shqipërisë.
Shkrimin e tij të parë e botoi kur ishte fare i ri, në muajt e parë të vitit 1933 dhe ishte një profil mbi Jeronim De Radën. Të fundmin e botoi në vitin 2019, tre vjet pas vdekjes dhe është kolana e plotë e jetës dhe historisë së Skënderbeut. Pa llogaritur pjesën e pabotuar të studimeve të tij, që është e konsiderueshme dhe do të vijojë të botohet edhe për shumë vite në vijim, ai shkroi e botoi për mbi tetë dekada me radhë, në katër periudha historike: gjatë mbretërisë, në periudhën e luftës antifashiste, gjatë totalitarizmit ideologjik e shtetëror dhe në më shumë se njëzet e pesë vjet të shoqërisë së lirë.
Kristo Frashëri ka një bibliografi të pasur e cila përmban vjersha, skica e tregime, reportazhe, shkrime përkujtimorë, polemika shkencore, çështje të debatueshme, tekste shkollore për politeknikumin, albume, libra popullarizues me ilustrime, synopse, prospekte, artikuj shkencorë në shqip e gjuhë të huaj, projekte tekstesh akademike-universitare, libra për njohjen e Shqipërisë nga të huajt, studime për çështje të identitetit shqiptar, për periudhizimin e historisë kombëtare dhe tipologjinë e qytetërimit iliro-shqiptar, monografi kushtuar personaliteteve dhe ngjarjeve me karakter parësor në mbijetesën ndërshekullore të shqiptarëve, përmbledhje artikujsh e studimesh në prerje tematologjike e kronologjike, letërsi memoaristike, bioshkrime dhe autobioshkrime, bibliografi e autobibliografi, recensione e autorecensione, kritikë dokumentare dhe kritikë shkencore.
