Shoqata shqiptare në Itali “Le Aquile Di Seta” (Shqiponjat e Mëndafshta) do të marrë pjesë në një takim të rëndësishëm midis shoqatave lokale në Itali. “Shqiponjat e Mëndafshta” përfaqësohet nga Kristina Blushi në takimin me temë “Emigrantët, mes integrimit dhe solidaritetit”.

Lexo edhe – “Shqiponja e mëndafshtë”, krijohet shoqata e grave shqiptare në Bari

Takimi mes shoqatave lokale do të zhvillohet më 4 dhjetor dhe ka si synim të trajtojë tematika që lidhen me integrimin e emigrantëve në shoqërinë ku jetojnë.

“Solidariteti, integrimi dhe përfshirja janë aspekte themelore të menaxhimit të fenomenit të emigracionit. Shoqata të shumta në zonën tonë merren me këto çështje çdo ditë: vullnetarët kanë krijuar projekte inovative për të thyer stereotipet dhe për të mposhtur frikën”, shkruhet në faqen zyrtare të shoqatës.

Shoqata e grave shqiptare “Shqiponjat e Mëndafshta” e krijuar këtë vit synon të mbrojë dhe përmirësojë historinë dhe të kaluarën e Diasporës Shqiptare në Itali, duke parë të ardhmen e komunitetit. Të vetëdijshme se ka shumë shoqata të tjera me të cilat shpresojnë për një bashkëpunim në të ardhmen. Gratë shqiptare të Barit duan të jenë një risi me një frymë bashkëpunimi, duke mësuar nga gabimet e së kaluarës dhe duke u përpjekur të ndërtojnë një rrjet më të mirë.