Në Philadelphia të SHBA-së jetojnë më shumë se 30 mijë shqiptarë dhe janë 300 biznese të tyre. Kreu i shoqatës “Bijtë e shqipes”, Bujar Gjoka në një intervistë flet për integrimin e shqiptarëve në këtë shtet.
“Jemi më shumë se 30 mijë shqiptarë në Philadelphia dhe më shumë se 300 biznese shqiptare. Jemi një komunitet i ri pasi 90% e shqiptarëve të ardhur këtu janë pas viteve ’90 dhe shumica e bizneseve të reja që janë hapur po përparojnë shpejt dhe suksesshëm dhe brezi i ri është 80% e të rinjve kanë përfunduar universitetet dhe janë në pozicione shumë të mira në punë e korporata”, thotë ai.
Ai thotë se shqiptarët janë shumë bashkëpunues me njëri-tjetrin e madje dhe në vendet ku punojnë apo kanë sipërmarrje kërkojnë bashkëkombës të tyre.
“Është ndërtuar një terren i tillë që të gjithë punonjësit dhe sipërmarrësit kudo që janë nëpër vende pune sot thonë “ka mundësi të na sjellin shqiptarë”. Në punë ne jemi shumë punëtor”, vijon ai.
Shoqata “Bijtë e Shqipes” ka 18 vite që ekziston si e tillë dhe është e mirëorganizuar. Aktivitet janë të shumta dhe numërohen rreth 35 të tilla në vit. Gjithashtu dhe bashkëpunimi me autoritet lokale në Filadelfia është i ngushtë.
“Këtu bashkia ka një drejtori që merret me komunitetet dhe emigracionin dhe ne kemi një bashkëpunim të ngushtë me to për të gjitha aktivitetet që ne zhvillojmë dhe festa e flamurit është pjesa kryesore e jona”, thotë ai.
