“Derë e Hapur” është filmi shqiptar i cili do të konkurrojë në Oscar dhe ky bashkëpunim shqiptaro-italian nuk ka qëndruar jashtë vëmendjes së shtëpisë italiane të kinematografisë.

Portali i saj Cinecitta shkruan se filmi i Florenc Papas i prodhuar në vitin 2019 është gjithashtu dhe një bashkëprodhim nga Riccardo Neri për italianen Lupin Film.

Filmi ka marrë pjesë në festivale të shumta ndërkombëtare dhe së fundmi fitoi çmimet Cineuropa Award Best Film dhe Audience Best Film në Festivalin e kinemasë Europiane në Lece 2020.

Filmi “Derë e hapur”, personazh kryesor ka Elmën, që është një vajzë e re shqiptare, e cila jeton ilegalisht në Itali.

Ajo është shtatzënë dhe babai i fëmijës tashmë është në burg. Pas depërtimit nga policia italiane, duke mos ditur kujt t’i drejtohet për ndihmë, ajo vendos të kthehet tek motra e saj e madhe, Rudina. Të dy motrat do të nisin një rrugë të gjatë me veturë drejt shtëpisë së babait të tyre tradicional. Ndërsa Rudina nget veturën, Elma do bëjë ç’të mundet për të mos shkuar atje.

“Duke qenë se gjithmonë e kisha imagjinuar të bëja një kinema më evropiane me rastin e Sofia Meetings në 2017 pata mundësinë të takoja në Script Pitch Florenc Papas që më prezantoi këtë projekt. Unë isha i ngazëllyer nga historia, dhe ai si autor. Ne filluam të punojmë për skenarin dhe strukturën e prodhimit gjithashtu me Eno Milkanin, një producent shqiptar. Unë isha i interesuar të përpiqesha të gjeja një mënyrë për një vend që është gjeografikisht i afërt, por i largët për të punuar. Rezultati është një film i thjeshtë dhe i pastër, por i bërë mirë. Florenci është një tregimtar i aftë, me një ndjeshmëri të fortë., Ne tashmë jemi duke punuar në projektin e tij të radhës dhe ndërkohë kryqëzojmë duart për rrugën që po bën “Open Door” (Derë e hapur)”, ka thënë Ricardo Neri.