Italia ka miratuar paketën e katërt të ndihmës për të mbështetur bizneset e prekura nga pandemia dhe masat e fundit të vendosura nga qeveria italiane.

Paketa e ndihmës ka një vlerë prej 8 miliardë eurosh dhe shtyn afatet e taksave për kompanitë në zonat që janë në masa të rrepta të bllokimit.

Sipas mediave italiane, paketa ofron një shumë prej 1.000 € për punëtorët në turizëm, arte, sporte, si dhe caktimin e fondeve për sektorin e konventave dhe një prani të rritur të policisë për të siguruar respektimin e masave anti-koronavirus.

Një mase e ashpër, ajo e izolimit të 60 milionë banorëve të saj vuri në kontroll valën e parë të shpërthimit të virusit në vendin i cili ishte i pari që u prek rëndë nga pandemia. Por numri i rasteve është rritur ndjeshëm dhe në muajt e fundit çka solli nevojën e masave të reja.

Roma është përpjekur të shmangë një bllokim tjetër pas goditjes së parë të ekonomisë, duke u përqendruar te kufizimet rajonale, së bashku me një shtetrrethim brenda vendit gjatë orëve të natës.

Ndërkaq, është duke u shqyrtuar mundësia për festimet e Krishtlindjeve dhe Vitit të ri, çka mendohet që të ketë një kufizim deri në 6 persona për festime. Kjo vjen për faktin se këto festime sjellin mundësinë e një vale të tretë pandemie.

Në Itali ka mjaft shqiptarë që kanë bizneset e tyre e që janë prekur rëndë nga masat e vendosura për frenimin e rritjes së rasteve me koronavirus. Qeveria italiane pritet të bëjë të ditur me detaje këtë paketë ndihme prej 8 milionë eurosh.