Festa e Flamuri nuk ka munguar as në shkollën shqipe “Ardhmëria” në Londër. Të gjithë nxënësit u përgatitën në shtëpitë e tyre për festën e këtij viti, e cila u zhvillua virtualisht për shkak të pandemisë së COVID-19. Organizatorët dhe njëkohësisht mësuesit e kësaj shkolle tregojnë se këtë vit nuk patën mundësi të mblidhen bashkë shumë shqiptarë të Diasporës që jetojnë në Londër, por gjithsesi kartolina festive ishte mjaft e bukur falë dëshirës së fëmijëve.
“Këtë vit kartolina e shkollës shqipe “Ardhmëria” ka një sfond tjetër. Nuk ka as skenë dhe as komunitetin i cili gjithmonë ka qënë pjesë e pandarë e festimeve dhe e aktiviteteve që ajo ka bërë ndër vite. Sot sfondi është në një ambient të qetë shtëpie. Ky është një vit ndryshe nga të tjerët që shënon edhe një mënyrë ndryshe festimi! Fëmijët, shqipet e vogla, të gjithë si gjithmonë të bashkuar, duke gëzuar dhe përkujtuar ditën e shenjtë të shqiptarit. Gëzuar 28 Nëntorin ! Gëzuar flamuri më i bukur në botë!”, tregon për “Diaspora Shqiptare” Anila Kadija, mësuese e gjuhës shqipe dhe drejtuese artistike, e shoqatës Ardhmëria, Londër.
Këtë vit mësimi në shkollën shqipe “Ardhmëria” po zhvillohet online me ndihmën e teksteve shkollorë në shqip të dërguar falas nga Qendra e Botimeve për Diasporën.
