Këngëtarja shqiptare nga Gjilani Tringa Rexhepi ka zgjedhur të urojë bashkëkombasit e saj për festën e 28 Nëntorit me një interpretim të ri të këngës “Moj e bukura Arbëri”.  Këtë këngë ajo e ka sjell në bashkëpunim me bashkëshortin e saj Scott Christian, i cili interpreton në piano.

“Doja të publikoja këtë këngë sot si një letër dashurie për atdheun tim të bukur”. Po edhe për të uruar shqiptarët kudo që janë, duke i dhënë një moment dhe ndjenjë nostalgjike për atdheun tonë. Në këto kohë të vështira me pandeminë, muzika mund të na bashkojë edhe pse jemi larg. Ju falënderoj. Urime festa e flamurit”, tha për “Diaspora Shiptare” Rexhepi.

Kënga është ripërpunuar dhe interpretuar në piano nga muzikanti kanadez Scott Christian. “Ndjehem krenare që po prezantoj audiencën kanadeze me kulturën dhe artin tonë. Besoj që është hera parë që një kanadez interpreton muzikën e Vaçe Zelës” shtoi ajo.

Tringa Rexhepi jeton në Kanada dhe ka mbaruar studimet për këndim dhe aktrim. Prej 12 vitesh Rexhepi punon në fushën e artit profesional në Kanada. Është larguar nga Kosova në moshën 8-vjeçare, por lidhja e saj me muzikën shqiptare është shumë e fortë.

“Edhe pse kam ardhur në Kanada prej kohës së luftës në Kosovë, kur isha vetëm 8 vjeç, gjithmonë kam qenë shumë e lidhur me muzikën e vjetër shqiptare. Kanë ndikuar shumë mami dhe babi, sepse mami ka qenë aktore/kengtare në Kosovë,  babi muzikant dhe artist. Vaçe Zela është këngëtarja ime më e preferuar, dhe mendoj se teksti kësaj kënge është një nga tekstet më të bukura në gjuhën shqipe”, tregon për “Diaspora Shqiptare” Tringa Rexhepi.