Shoqata e Bashkësisë Shqiptaro-kanadeze pak kohë më parë festoi 30-vjetorin e saj të themelimit, e cila lindi si një nevojë për të forcuar e dëgjuar identitetin kombëtar shqiptar në Kanada si një përgjigje ndaj dhunës serbe në Kosovë.

Sipas asaj që tregon për Diaspora Shqiptare Viola Kaloutsi suksesi i secilit prej anëtarëve është edhe një sukses i mirëfilltë edhe për suksesin e komunitetit.

Nëntori është muaji i shqiptarëve në Toronto për shumë arsye, festa e Pavarësise, legjitimimi në parlament si muaji i trashëgimisë por këtë vit ka qenë edhe me i vecantë pasi Shoqata e Bashkësisë Shqiptaro-Kanadaze ka festuar 30 vjetorin e saj. Si një nga pjestaret e hershme të komunitetit shqiptar në Toronto dhe pjesë e ekipit themelues si e kujtoni atë kohë?

Dua të falenderoj Diasporën Shqiptare për vlerësimin e kësaj interviste në prag të festës më të shënuar kombëtare, ngritjes së flamurit duke i uruar tokës amë dhe gjithë shqiptarëve në mbarë botën, gëzuar.

Krijimi i komunitetit shqiptar erdhi si domosdoshmëri politike në atë kohë dhe si përgjigje e situatës në Kosovë ndaj dhunës së serbëve mbi shqiptarët, ku dhe mediet në Kanada nuk na referoheshin as me identitet kombëtar, por herë si popull mysliman, herë të krishterë.
Detyra e parë në atë kohë ishte të sensibilizohej opinioni kanadez me atë çfarë po ndodhte në Kosovë.
Kështu filluam, me demonstratat e para në Parlament dhe para gjithë institucioneve mediatike, ambasadës jugosllave dhe kudo që mendonim që mund të fitonim qëllimin tonë, dhe në 1989 ja arritëm qëllimit, për herë të parë në Kanada u valëvit flamuri shqiptar.

Tre dekada janë një kohë e gjate dhe me një aktivitet të madh. Çfarë do të veçonit ju si ngjarjet me kryesore të shoqatës?
Komuniteti shqiptar në Kanada është shumë i organizuar. Cili është sekreti?

Komuniteti ka evolucionet e tij ndër vite, ku çdo njeri që ka vendosur edhe një gur të vetëm në themelet e saj për mendimin tim duhet të vlerësohen dhe të nderohet. Në çdo periudhe komuniteti ka kaluar ngjarje të rëndësishme. Suksesi i secilit prej nesh është edhe një sukses i mirëfilltë edhe për suksesin e komunitetit dhe është një rrugë me dy kalime. Sa më të suksesshëm të jemi si individë aq më të fortë e bëjmë dhe komunitetin shqiptar dhe ky është sekreti por gjithmonë mbetet kjo po të jemi të lidhur me njëri-tjetrin dhe pa menduar si status çmimet, dekoratat apo titujt.

Znj. Kaloutsi aktualisht ju keni një zyrë emigracioni në Kanada, por me degë në 14 vende të botës. Në situatën aktuale të pandemisë çdo sektor është prekur duke ngadalësuar ritmin. Duke qenë një eksperte e kësaj fushe si mendoni se do të ndryshojë emigracioni pas COVID-19?
Cilat do të jenë qasjet e shteteve ndaj emigracionit?

Situata të pa parashikuara dhe të pa menduara që po kalojmë ka ndikuar edhe fushën tonë, por nuk mund të dimë çfarë do ndodhë më pas. Gjatë dhe pas kësaj pandemie, po merren masa për riorganizim funksional dhe strategjik të punës, po vazhdojmë me transformimin ne online për të përballuar krizën fillimisht si dhe një hartim të rimëkëmbjes pas pandemisë.

Ka faktorë të brendshëm dhe të jashtëm për t’u marrë parasysh kur flasim për imigracionin në Kanada gjatë kësaj situate pandemike.

Emigracioni kanadez është e formuar nga demografia, ekonomia, politika, aftësia përpunuese dhe aftësia e Kanadasë për të integruar të sapoardhurit. Jashtë Kanadase, nivelet e imigracionit do të mbeten të ndikuara nga rrethanat globale.

Përsa i përket festës së Flamurit një pjesë e mirë e shqiptarëve jashtë vendit do e kremtojnë online. Si do e festoni dhe a mund të jetë njësoj emocioni i një ceremonie online me atë fizike?

Po përdor një shprehje të vjetër ku thuhet “sipas vendit bëhet kuvendi”, mendoj se edhe ne online do ketë emocionet e veta. E them këtë duke kujtuar veten në fëmijërinë time, ku gjithë festat kombëtare i përcillnim nëpërmjet televizionin dhe po kështu kalonim shumë emocionet. Gëzuar 28-29 Nëntorin!