“Shkolla shqipe Monthey Chablais” në Zvicër ka organizuar një program modest artistiko-kulturor për të festuar festat e nëntorit. Për shkak të pandemisë organizimi është bërë vetëm me nxënësit e shkollës, ndryshe nga sa ishte programuar.

“Meqenëse ishte viti i parë dhe shkolla jonë për nder të festave të Nëntorit kishim planifikuar të bënim një program artistiko-kulturor ku do të ftonim personalitete të shquara kombëtare dhe të huaja për të festuar, kjo ishte e pamundur për shkak të pandemisë. Por, për t’i dhënë ngjyrë apo frymëzim këtyre datave historike kombëtare ne në klasë më organizuam një program të shkurtër me recitime, këngë, zbukuruam klasën, sepse fëmijët ishin mjaft të entuziazmuar për të festuar me ngjyrat kuq e zi. Programi u mbajt në klasë pa prezencën e prindërve dhe kryesisë së shkollës” tregon mësuesja Ganimete Demiri.

Në këtë vit shkolla e mësimit plotësues “Shkolla Shqipe Monthey Chablais”, me iniciativën e Zenun Shalës dhe bashkëpunimit të anëtarëve të tjerë të kryesisë: Dugagjin Ramosaj, Valentina Ramosaj dhe Yllka Shehut ka filluar mësimin më 16 shtator 2020, në qytetin Monthey pas disa viteve ndalesë.

Fëmijë e shkollës kanë uruar njëzëri “Urime 28 Nëntori të gjithë shqiptarëve anë e mbanë!”. Ndërkohë mësuesja e shkollë shprehet se uron që nëntorët e ardhshëm të festojnë të gjithë së bashku “Uroj që nëntorët tjerë t’i presim të gjithë së bashku duke festuar si vitet e mëparshme”.