Sopranoja e njohur shqiptare në Gjermani Elbenita Kajtazi ka zgjedhur në këto momente pandemia të nisë një iniciativë të veçantë, të sjellë operan në gjuhën shqipe në ndihmë të studentëve në Shqipëri, Kosovë e Maqedoninë e Veriut.

Për të realizuar këtë Kajtazi ka vendosur të hapë një kanal në YouTube.

“Dhe pse jam e angazhuar me rolet e ndryshme për momentin, e prej 7 vitesh në Gjermani më ka ardh ide që të gjitha rolet që unë i performoj, këndoj e studioj t’i ndaj me ju, shpjegimin e tyre në gjuhën shqipe, mëqë kam studiuar në Prishtinë dhe e di sa mungesë ka të përkthimeve”, thotë Elbenita në videon e saj të parë.

Ajo ka vendosur të jetë sa më shumë komunikative me të gjithë studentët duke lënë në dispozicion dhe një adresë emaili ku mund ti shkruajnë për gjithçka dhe pse për vetë sopranon do të jetë një studim i madh.

Elbenita është diplomuar në Universitetin e Prishtinës, ku ka bërë debutimin e saj me Orkestrën Filarmonike të Kosovës në vitin 2009, duke kënduar shumë koncerte gjatë gjithë sezonit.

Ajo ka fituar disa çmime kombëtare dhe ndërkombëtare. Më së fundmi, ajo fitoi çmimin e parë në “2015 Riçardo Zandonai Vocal Competition” në Itali, së bashku me dy çmime të veçanta: një angazhim në Theatro São Pedro në Sao Paolo, Brazil dhe një angazhim në Shtëpinë e Operës Daegu në Korenë e Jugut.

Në vitin 2014 ajo fitoi çmimin e parë “Spiros Argiris” në Festivalin Sarzana, Itali. Në vitin 2012, ajo fitoi çmimin e parë në Festivalin e Këngës së Flamurit dhe Koncertin Ndërkombëtar të Muzikës ARS Kosova 2009.

Ajo gjithashtu mori një bursë në verën e vitit 2013 për të ndjekur Programin Campo d’Oro në Nju Jork.