Viti 2020 mund të ketë qenë një vit i keq për turizmin ndërkombëtar, duke qene se pandemia detyro mbylljen e shumë vendeve për një kohë të gjatë, por pandemia me sa duket i ka shërbyer së paku turizmit lokal. Këtë vit nën moton “Pusho Shqip”, vëmendja e agjensive dhe operatorëve turistik u përqendrua në promovimin e turizmin brenda vendit duke propozuar destinacione të reja, shpesh edhe të paeksploruara më parë. Një prej tyre është edhe Liqeni i Dushkut i cili ndodhet pranë Gramshit.
Liqeni i Dushkut ose siç njihet ndryshe Liqeni i Zambakëve ndodhet në afërsi të fshatit Lenie, në lartësinë 1105 metra mbi nivelin e detit.
Ky liqen është nga më interesantët në zonën e Gramshit. Liqeni i Dushkut përfaqëson një liqen akullnajor me gjatësi rreth 800 metra dhe gjerësi 400 metra. Ka botë të gjallë të pasur, në të cilën dallohen sidomos zambakët e mëdhenj të ujit që njihen ndryshe si simboli i jetës, pasionit, dashurisë dhe pastërtisë.
Gjenden edhe lloje të ndryshme peshqish të cilët japin një shfaqje të mrekullueshme teksa shfaqen dhe zhduken përsëri pas zambakëve.
Duket sikur këtë liqen e ruajnë shumë mirë dhe i japin pamje akoma dhe më të bukur pishat të cilat gjenden në një sipërfaqe rreth 12 hektar duke formuar një ekosistem tepër interesant liqenor e pyjor. Ka vlera shkencore gjeologjike, gjeomorfologjike, hidrologjike e biologjike, didaktike, kulturore, ekologjike dhe turistike.
