COVID -19 i merr jetën një tjetër ikone të humorit shqiptar. Aktori Fatmir Xhelili është shuar sot në moshën 69-vjeçare.
Aktor në teatrin “Bylis” të Fierit, Fatmir Xhelili, për 46 vjet rresht, ka interpretuar përkrah emrave të tjerë të mëdhenj si Fuat Boçi, Luftar Paja, Hajrie Rondo etj.
Fatmiri Xhelili si shumë aktorë të brezit të tij e ka nisur rrugën e artit si aktor amator. Ai numëron rreth 180 role në dramë dhe komedi dhe është vlerësuar me katër çmime të para si aktori më i mirë. Kujtojmë komeditë ku ai ka interpretuar në role kryesore si “Dy dyzina me trëndafila”, “Fejesa e Çehovit”, “Një budalla e gjysmë” etj..
Për ndarjen nga jeta të aktorit të humorit Fatmir Xhelili ka folur drejtori i teatrit “Bylis” në Fier Klajdi Marku.
Ai shprehet se arti shqiptar ka humbur një aktor të madh që ka lënë pas vepra të mrekullueshme.
“Ishte një lajm shumë i dhimbshëm. Na iku shoku, vëllai. Me Fatmirin ishim lidhur për punën, ishte krahu im i djathtë prej 15 vitesh. Fatmirin e kisha shtyllën ku mbështetësha. Është një humbje shumë e madhe për teatrin. Ishte një humbje e madhe për artin shqiptar. Fatmiri ka lënë vepra të mrekullueshme” – tha drejtori i teatrit.
