Elseid Hysaj ka rezultuar pozitiv me koronavirus. Konfirmimi është bërë 24 orë para ndeshjes së kombëtares shqiptare të futbollit me Bjellorusinë.
Ka qenë pikërisht FSHF që ka njoftuar mungesën e mbrojtësit shqiptar të Napolit.
“Mbrojtësi i Kombëtares, Elseid Hysaj, humbet ndeshjen ndaj Bjellorusisë pasi ka rezultuar pozitiv në testin e COVID-19.
Zyra e shtypit në FSHF bën me dije se futbollisti është njohur me rezultatin e tamponit gjatë mbrëmjes dhe është karantinuar menjëherë.
Njëkohësisht, njoftohet se të gjithë lojtarët e tjerë dhe stafi teknik i Kombëtares, të cilët i janë nënshtruar tamponëve sot (sipas protokollit një ditë përpara ndeshjes), kanë rezultuar negativë. Hysaj do ta kryejë karantinën në Shqipëri derisa të rezultojë negativ”, thotë FSHF.