Në ishullin e Kretës jetojnë aktualisht rreth 30.000 qytetarë shqiptarë, të vendosur aty prej më shumë se dy dekadash. Tribuna TV nepermjet nje kronike televizive tregon disa biznese shqiptare të kësaj zone të cilët janë integruar më së miri në komunitet.
“Ka një numër të konsiderueshëm shqiptarësh që janë me biznese në Hania në fusha të ndryshme. Fatmirësisht shqiptarët kanë punuar në fusha të ndryshme, po me atë që kam parë vitet e fundit është ajo e gastronomisë, e lidhur me turizmin. Vlen për tu theksuar se shqiptarët janë të përhapur në të gjitha fushat”, thotë Ëngjëll Alizoti, pronar i “Angelo’s Restaurant”.
Klementi Osmanllari është një tjetër dëshmi e integrimit profesional pas vitesh të tëra pune si specialist mishi. Dyqani i tij i mishit qëndron hapur dhe në dimër pas përfundimit të sezonit turistik, pasi klientët e tij vijnë gjatë gjithë vitit dhe nga zonat më të largëta.
“Pas një eksperience rreth 20-vjeçare në këtë zanat, mora vendimin pse jo të hapim dhe biznesin tonë. Pas shumë kohe arritëm, biznesi ecte mirë, sivjet me koronavirus sezoni ishte pak i luhatur. Kemi klientë dhe individë dhe magazina, hotele se këtu jemi një zonë turistike dhe përqendrohemi më shumë në taverna e hotele. Këtu në këtë zonë shqiptarët pas shumë shumë vitesh sot është pothuajse shtresa e mesme e ekonomisë në Kretë. Në këtë zonë që banojmë janë rreth mbi 15 restorante që zotërohen nga shqiptarët”, thotë Klement Osmanllari.
Leonard Lici, një tjetër biznesmen shqiptar ka një restorant në Therino, por pas mbylljes së sezonit turistik merret me vjeljen e ullinjve. Ai e hapi lokalin e tij pas 12 vitesh eksperiencë pune në lokale të tjera. Therino restorant prej 2009 është në menaxhimin e Leonardit.
“Neraida Restorant” i Erion Dervishit është një tjetër restorant familjar që e mbështesin mjaft bashkatdhetar. Ai e ka hapur këtë biznes para katër vitesh.
Restorantet shqiptare janë të preferuar dhe nga të huajt që vijnë në Kretë. Një çift danez që ka vendosur të jetojë atje thonë se janë klientë të përhershëm të restoranteve që kanë pronarë shqiptare. Për ta shqiptarët janë miq të mirë, janë familje shumë të mira dhe kanë një shërbim të shkëlqyer.
Ndër vite, pjesa më e madhe janë integruar në mënyrë impresionuese dhe mjaft prej tyre janë pronarë biznesesh jetike për ekonominë e ishullit, por edhe për vetë komunitetin, teksa në këto biznese janë punësuar përgjithësisht bashkatdhetarë të pronarëve, pra shqiptarë.
