Fundjava për fëmijët shqiptarë në Patra të Greqisë nuk është tërësisht shkëputje nga shkolla, pasi ata me dëshirë dhe përkushtim kanë zgjedhur të jenë pjesë e shkollës shqipe “Naim Frashëri” që ka çelur dyert për fëmijët këtë fundjavë.
Shkolla e gjuhës shqipe “Naim Frashëri” në Patra të Greqisë filloi sot kurset e mësimdhënies së gjuhës shqipe. Sot, në ditën e shtunë, datë 17 tetor mësimi do të fillojë vetëm për klasat e para. Mësimi do të zhvillohet edhe ditën e nesërme, datë 18 tetor.
Shkolla shqipe “Naim Frashëri” fton gjithashtu të gjithë nxënësit që të pajisen me tekste në gjuhën shqipe.
Tekstet për mësimin gjuhës shqipe për këtë shkollë janë siguruar nga Qendra e Botimeve për Diasporën në bashkëpunim të ngushtë me Ministrinë për Evropën dhe Punët e Jashtme, dhe Ambasadën e Republikës së Shqipërisë në Greqi.