Ambasada e Republikës së Shqipërisë në Athinë për tu ardhur në ndihmë shqiptarëve në ishullin e Kretës, ka ngritur një ekip të posaçëm që do të jetë prezent më datat 23-27 nëntor 2020 në ishull.

Ekipi i ngritur posaçërisht për realizimin e këtij projekti, lidhur me aplikimet për pajisjen me pasaportë dhe kartë identiteti në qendrat kryesore të ishujve të Greqisë do të gjendet në qytetin e Iraklios, Kretë.

“Qytetarët e interesuar janë të lutur të vijojnë dërgimin e kërkesave në adresën [email protected] të Ambasadës së Republikës së Shqipërisë në Athinë si dhe për çdo informacion apo asistencë t’i drejtohen postës sonë elektronike”, thuhet në njoftimin e Ambasadës.

Sjellim në vëmendjen tuaj se i gjithë procesi administrohet nga Ambasada e Republikës së Shqipërisë, për këtë arsye nxisim të gjithë bashkatdhetarët tanë të jenë të kujdesshëm për të mos rënë pre e personave apo entiteteve të tjera të paautorizuar për këtë proces, të cilët synojnë përfshirjen për përfitime personale.